ხმაური საოლქო კომისიაში საჩივრების განხილვისას

N37 ახალციხის საარჩევნო ოლქი გუშინ, 28 ოქტომბერს, 4 საჩივარს დაახლოებით 3 საათის განმავლობაში იხილავდა. მათ შორის, 3 საჩივარი N12 აგარის საარჩევნო უბნიდან იყო შესული. აღნიშნული საჩივრები „მრავალეროვანი საქართველოს“ და „ახალი თაობა დემოკრატიული საქართველოს“ წარმომადგენლებმა დაწერეს.

N12 უბანზე საჩივრები ხმის დათვლისა და კენჭისყრის შედეგების შემაჯამებელი პროცედურების დარღვევას ეხებოდა. N25 აბათხევის საარჩევნო უბანზე კი საჩივარი ოქმის არასრულად შევსების გამო დაიწერა.

კომისიის წევრებს შორის დებატები N12 აგარის უბნის საჩივრების განხილვამ გამოიწვია. აქ საჩივრის ავტორები კომისიის თავმჯდომარისა და მდივნის დისციპლინური პასუხისმგებლობის საკითხის დაყენებას მოითხოვდნენ. იგივე მოთხოვნა იყო დაყენებული საძელის უბანზე დაწერილ საჩივარშიც. თუმცა, კომისიას მსჯელობისა და კანჭისყრის შემდეგ დისციპლინური პასუხისმგებლობა არცერთი უბნის არცერთი წარმომადგენლისთვის არ დაუკისრებია.

იმის შესახებ, რა მოხდა კენჭისყრის საღამოს აგარის საარჩევნო უბანზე, „სამხრეთის კარბიჭე“ დეტალურად მოგვიანებით გიამბობთ.

[თამუნა უჩიძე, ახალციხე]