ბორჯომში სტიქიით დაღუპულის ოჯახს თვითმმართველობა 3.000 ლარით დაეხმარა

მურმან ლომსაძე ადიდებულ საკირულაში დაიხრჩო. ბორჯომის მუნიციპალიტეტის გამგეობამ დაღუპულის ოჯახს თანხა უკვე გადაურიცხა.

"სოციალურ დახმარებაში გვაქვს ასეთი მუხლი, ჩაშლილი სტიქიის შედეგად დაზარალებული ოჯახებისთვის, თანხა აქედან გამოვყავით“, – განაცხადა ბორჯომის მუნიციპალიტეტის გამგეობის საფინანსო–საბიუჯეტო განყოფილების უფროსმა მარინა ისაკაძემ.

შეგახსენებთ, რომ ბორჯომის მუნიციპალიტეტში 3 ივნისს მოსული ძლიერი წვიმის გამო მდინარე საკირულა ადიდდა, რამაც დააზარალა ოთხი სოფელი: დვირი, საკირე, ტაძრისი და დგვარი.

ამ სოფლებში დაზიანდა გზებიც და არსებობს საშიშროება, რომ მოწყდეს სამი სოფლის: ტაძრისის, საკირესა და დგვარის დამაკავშირებელი გზა.

ბორჯომის მუნიციპალიტეტის გამგეობაში უკვე შექმნილია ზარალის დამთვლელი სამუშაო ჯგუფი.

[sknews.ge]