საინიციატივო ჯგუფის კანდიდატმა ელვარდი ზაზაძემ კანდიდატურა მოხსნა

N37/03 აგარის მაჟორიტარულ საარჩევნო ოლქში მაჟორიტარი დეპუტატობის კანდიდატმა ელვარდი ზაზაძემ კანდიდატურის მოხსნის შესახებ ახალციხის N37 ოლქში განcხადება 4 ივნისს დაწერა. ზაზაძე აგარაში ზურაბ მაისურაძის საინიციატივო ჯგუფმა 6 მაისს დაარეგისტრირა.

ელვარდი ზაზაძე კანდიდატურის მოხსნას პირად საქმეებს უკავშირებს და ამბობს, რომ ის „ქართული ოცნების“ წევრია და პარტიული ინტერესების წინააღმდეგ წასვლას არ აპირებს.

„მაშინვე მინდოდა მომეხსნა კანიდატურა, მაგრამ ვერ მოვახერხე მისვლა. სინამდვილეში, მე ვარ „ოცნების“ წევრი, გამომდინარე იქიდან, რომ პარტიული ინტერესების წინააღმდეგ არასოდეს წავსულვარ, ვერ ვიქნებოდი საინიციატივო ჯგუფის კანდიდატი“, – ამბობს ელვარდი ზაზაძე.

საინიციატივო ჯგუფის ხელმძღვანელი ზურაბ მაისურაძე კომენტარის გაკეთებისაგან თავს იკავებს და ამბობს, რომ გადაწყვეტილება ელვარდი ზაზაძემ თავად მიიღო და ამიტომ პასუხიც მისგან უნდა მოვისმინოთ: „მისი გადაწყვეტილებაა და მას დაელაპარაკეთ. ჩვენს საინიციატივო ჯგუფს არჩევნებში მაჟორიტარი დეპუტატობის კანდიდატი არ ეყოლება“.

[sknews.ge]