ახალციხეში ასოცირების ხელშეკრულების შესახებ იმსჯელეს

შეხვედრას ყოფილი საგარეო საქმეთა მინისტრი ეკა ტყეშელაშვილი და ეკონომიკის მინისტრის ყოფილი მოადგილე თამარ კოვზირიძე უძღვებოდნენ.

ტყეშელაშვილმა ევროკავშირსა და ვიზების ლიბერალიზაციის შესახებ ისაუბრა, კოვზირიძემ კი მოხსენება ეკონომიკურ ინტეგრაციასა და ასოცირების ხელშეკრულებაზე გააკეთა.

შეხვედრას არასამთავრობო სექტორისა და მედიის წარმომადგენლები, ასევე ახალგაზრდები ესწრებოდნენ.

„ჩვენი მიზანია გაცილებით სიღრმისეულად გაიაზრონ თანამოქალაქეებმა და მით უფრო ეთნიკური უმცირესობების წარმომადგენლებმა, ის, თუ რა სიკეთის მოტანა შეუძლია ქვეყნისთვის ევროინტეგრაციას. უკეთ გაიაზრონ თუ რა პერსპექტივებს მოგვიტანს და როგორ გააუმჯობესებს ჩვენ ყოფას ევროპასთან ინტეგრაცია“, - ამბობს ტყეშელაშვილი.

შეხვედრით კმაყოფილი დარჩა აუდიტორია. „რეგიონული განვთარების ასოციაციის“ თავმჯდომარის ნანა ზუბაშვილის თქმით, ასოცირების ხელშეკრულებასთან დაკავშირებით რეგიონში ინფორმაციის სიმწირეა.

„მოსახლეობამ ბევრი რამ არ იცის ამის შესახებ და ამიტომ შიშით უყურებენ, - ამბობს ზუბაშვილი და ამატებს, რომ მას ძირითადად სოფლის მეურნეობის საკითხები და ვაჭრობის ხელშეკრულება აინტერესებდა, - აქ მნიშვნელოვანია ის, თუ რამდენად დააწვება ეს პროცესი გლეხს. მაგრამ აღმოჩნდა, რომ რიგი საკითხების მოსაგვარებლად გაკრვეული რეგულაციები და საკმარისი ვადაა გათვალისწინებული, ანუ ეს პროცესი ზეწოლას არ გულისხმობს და ამ ყველაფერს მშვიდად შეგვიძლია შევხვდეთ“.

შეხვედრა საქართველოს სტრატეგიული კვლევის ინსტიტუტის ორგანიზებითა და ლიტვის საგარეო საქმეთა სამინისტროს მხარდაჭერით გაიმართა.



[თამუნა უჩიძე, ახალციხე]