ძლიერი სეტყვა სოფელ ანში

ძლიერი წვიმა და სეტყვა სოფელ ანში დაახლოებით ერთი საათის წინ დაიწყო. როგორც ადგილობრივები ამბობენ, თხილისხელა სეტყვა ნახევარი საათის განმავლობაში გრძელდებოდა. მოულოდნელად გაუარესებულმა ამინდმა ადგილობრივებს ხეხილის ბაღები დაუზიანა.

”ყურძენი, ჭანჭური, სულ გაანადგურა, ძირს ჩამოიტანა, ხეებს აღარაფერი შეარჩინა”, - ამბობს სოფლის მცხოვრები გოდერძი გოდელაძე.

მისივე თქმით, დაზიანდა თუ არა საცხოვრებელი სახლების სახურავები, ამ დროისთვის უცნობია. ამ წუთებში ადგილობრივები სოფლის ცენტრში არიან შეკრებილი და ცდილობენ გაარკვიონ, სად რა დააზიანა სეტყვამ.

ახალციხის მუნიციპალიტეტის სოფელ ანში დაახლოებით 75 კომლი ცხოვრობს. ადგილობრივები მომხდარის გადასაღებად სოფელში ტელევიიზიის ასვლას ითხოვენ და შემდგომ რეაგირებას ადგილობრივი ხელისუფლებისგან ელოდებიან.

[sknews.ge]