სტიქიამ ადიგენის მუნიციპალიტეტი დააზარალა

ლელოვანში, კახარეთსა და იმერთუბანში სეტყვა გუშინ დაახლოებით 17:00 საათისთვის დაიწყო და ოც წუთს გაგრძელდა. როგორც ადგილობრივები ამბობენ, სეტყვის შედეგად მოსავლის 90% განადგურდა.

-”სიმინდი, ლობიო, პომიდორი და ხეხილი ისე გაასწორა მიწასთან, რომ იქიდან აღარაფერი გადარჩება. მარტო კარტოფილი დარჩა მიწაში”, - გვითხრა კახარეთში მცხოვრებმა ფოლად სურმანიძემ.

ლელოვნელების თქმით, წელს ასეთი ძლიერი სეტყვა მესამედ მოვიდა.

-”პირველად ერთი თვის წინ, კვერცხის ოდენა სეტყვა მოვიდა, მაშინ ჯერ კარტოფილი, სიმინდი და ლობიო ამოსული არ იყო, ამიტომ ნათესები ნაკლებად დააზიანა. ამჯერად ყველაფერი ამოსული იყო და ბოლომდე გაანადგურა კიდეც”, - ამბობს სოფელ ლელოვანის მკვიდრი ეკა ჩირგაძე.

სეტყვას თან ძლიერი წვიმა ერთვოდა, ლელოვანში წყალი სახლებში და ძროხის სადგომებში შევარდა.

-”წყალი სახლებში, საღორეებში და საქათმეში შემოგვივარდა. იმხელა ნიაღვარი მოდიოდა გარეთ ვერ გამოვდიოდით”, - გვიყვება ლელოვნელი ცირა წითაშვილი.

ადიგენის მუნიცპალიტეტის გამგებელი სიმონ პარუნაშვილი ამბობს, რომ მოსახლეობას დახმარებას არ დაჰპირებია: ”ზარალს დავითვლით და გადავცემთ თბილისს, რა როგორ ანაზღაურდება არ ვიცი”.

პარუნაშვილის განცხადებით, კომისია მუნიცპალიტეტის გამგეობაში გუშინვე შეიქმნა: ”ჯერ ზარალი ბოლომდე არ დაგვითვლია. ამ დრომდე არც განცხადება შემოსულა გამგეობაში იმის შესახებ, რომ ვინმეს რაიმე დაუზიანდა. ყველაზე მეტად ნათესები განადგურებული იმერთუბანშია, სხვა სოფლებში სტიქიას ზიანი მნიშვნელოვნად არაფრისთვის მიუყენებია”.

[ოთარ აწყურელი, ადიგენი]