დიპლომატიური კორპუსისთვის სამცხე-ჯავახეთში შემეცნებითი ტური ეწყობა

ღონისძიების ფარგლებში, დიპლომატები შეხვდებიან რეგიონის ხელმძღვანელობას; ეწვევიან ცალკეულ ქალაქებსა და დაბებს და მოინახულებენ საქართველოს კულტურული მემკვიდრეობის ძეგლებს.

ტური 24 მაისს, შაბათს, 8:00 საათზე დაიწყება. ამ დღეს დიპლომატები ბორჯომის პარკს, რომანოვების სასახლეს და ახალციხის ციხეს მოინახულებენ. 24 მაისი კონცერტით დასრულდება. კონცერტი 22:00 საათზე ახალციხის ციხეში გაიმართება. მეორე დღეს, 25 მაისს, კვირას, დიპლომატიური კორპუსის წარმომადგენლები ვარძიასა და ფოკას ესტუმრებიან.

შემეცნებითი ტურის მიზანი დიპლომატებისთვის რეგიონის უკეთ გაცნობაა. აღნიშნული ღონისძიება ხელს შეუწყობს სამცხე-ჯავახეთის მხარის შესაძლებლობების წარმოჩენას, რაც საშუალებას მისცემს დიპლომატებს მეტი ინფორმაცია მიიღონ რეგიონის კულტურული მახასიათებლების, მისი ტურისტული, საინვესტიციო და ინფრასტრუქტურული პოტენციალის შესახებ. ეს ხელს შეუწყობს უცხო ქვეყნების ელჩებს საჭირო ინფორმაციით უზრუნველყონ შესაბამის ქვეყნებში საქართველოთი დაინტერესებული საზოგადოება, მათ შორის, პოლიტიკური, საზოგადოებრივი და ბიზნესსექტორის წარმომადგენლები.

ტურში მონაწილეობას მიიღებენ საქართველოში აკრედიტებული როგორც რეზიდენტი, ისე არარეზიდენტი ელჩები.

გასული წლის ოქტომბერში, მსგავსი ტიპის ტური, საგარეო საქმეთა სამინისტრომ კახეთის რეგიონში მოაწყო.

[sknews.ge]