დიპლომატიური კორპუსის პირველი დღე სამცხე–ჯავახეთში

ელჩების ნაწილი შემეცნებით ტურში ოჯახის წევრებთან ერთად მონაწილეობს. საგარეო საქმეთა სამინისტროს ორგანიზებით მოწყობილ ტურს, საგარეო საქმეთა მინისტრი მაია ფანჯიკიძე ხელმძღვანელობს.

„ორდღიანი დიპლომატიური ტურის პირველი დღის კულტურული პროგრამა სრულდება აქ, რაბათის კომპლექსში. ვფიქრობ, რომ ყველაზე დიდი შთაბეჭდილება მოახდინა თავად ამ კომპლექსმა და ასევე მუზეუმმა. პირველად გახლდით აქ და აღფრთოვანებული ვარ ყველაფრით, რაც ვნახეთ. ელჩები კმაყოფილები არიან. მათთვის ეს პირველი მოგზაურობაა ამ რეგიონში“, - განაცხადა საგარეო საქმეთა მინისტრმა მაია ფანჯიკიძემ.

შემეცნებითი ტური რეგიონში ბორჯომიდან დაიწყო. თავდაპირველად დელეგაცია ბორჯომის პარკს ესტუმრა, სადაც მათთვის სიმფონიური ორკესტრი უკრავდა. მოგვიანებით ლიკანში, რომანოვების სასახლე დაათვალიერეს.

დიპლომატებისთვის ლიკანში გამართულ მიღებას, რეგიონში ვიზიტად მყოფი საქართველოს პრემიერ–მინისტრი, ირაკლი ღარიბაშვილიც დაესწრო.

ბორჯომიდან დიპლომატიური კორპუსის წარმომადგენლებმა ახალციხეში გადაინაცვლეს. აქ მათ რაბათის ისტორიული კომპლექსი მოინახულეს.

„ნამდვილად კარგი აზრია გააცნოთ ელჩებს საქართველო. მინდა გითხრათ, რომ რაბათში ვარ მეორედ, თუმცა არასდროს არ არის საკმარისი მოხვიდე და დაათვლიერო. თურქეთისა და საქართველოს ისტორია აქ რაღაცნაირად ირევა ერთმანეთში“, - ამბობს თურქეთის რესპუბლიკის საგანგებო და სრულუფლებიანი ელჩი საქართველოში ლევენთ მურათ ბურჰანი.

დღესვე დიპლომატებისთვის ახალციხის ციხეში კონცერტი გაიმართება. კონცერტი ქვედა ციხეში, ღია ცის ქვეშ, 22:00 საათზე დაიწყება.

დიპლომატების საინფორმაციო-შემეცნებითი ტური ხვალ დასრულდება. ხვალ ელჩები ასპინძასა და ნინოწმინდაში გაემგზავრებიან და ვარძიისა და ფოკის მონასტრებს მოინახულებენ.

დიპლომატებისთვის საინრომაციო-შემეცნებითი ტური საგარეო საქმეთა სამინისტროსა და ტურიზმის დეპარტამენტის ორგანიზებით მოეწყო. ტურის მიზანი დიპლომატიური კორპუსის წარმომადგენლებისათვის საქართველოს რეგიონების უკეთ გაცნობაა.

[თინათინ ზაზაძე,
მანანა სარაშვილი, ახალციხე]