ინფო-ტური ახალციხის ციხეში

”ჩვენი მიზანია ტურისტულ კომპანიებთან თანამშრომლობა, რათა მომავალი სეზონიდან დაიგეგმოს ტურები, ტურპაკეტებში ჩაისვას ახალციხის ციხე. სწორედ ამიტომ მოვიწვიეთ სხვადასხვა კომპანიები, რათა გაცნობოდნენ ციხეში არსებულ ინფრასტრუქტურას და საინფორმაციო ბაზას”, - გვიხსნის ახალციხის ციხის დირექტორის მოადგილე გიორგი ჩერქეზიშვილი.

ტურისტული კომპანიების წარმომადგენლები ციხის ადმინისტრაციასთან თანამშრომლობას გეგმავენ.

”ეს არის მშვენიერი კომპლექსი, რომელიც საინტერესო იქნება ნებისმიერი ტურისტისთვის. სასურველი იქნება გაკეთდეს მინიშნებები ციხის ტერიტორიაზე და მოგვარდეს სასმელი წყლის პრობლება”, - ამბობს ასოციაცია ”ელკანას” პროგრამის მენეჯერი თამაზ დონდუა.

კომპანიის წარმომაგნელების თქმით, ტურისტების მოსაზიდად კარგი იქნება თუ მოეწყობა რელიგიური და კულტურული ტურები. მათივე განცხადებით, რეგიონის საზღვრისპირა მდებარეობა მნიშვნელოვნად გაზრდის უცხოელი ტურისტების რაოდენობას.

ახალციხის ციხის კომპლექსის პოპულარიზაციის მიზნით ააიპ „ახალციხის ციხესა“ და „ელიტ ტურს“ შორის ურთიერთშეთანხმებისა და თანამშრომლობის მემორანდუმიც გაფორმდა. მემორანდუმის თანახმად, მხარეებმა ერთობლივი ძალისხმევით უნდა უზრუნველყონ ტურების დაგეგმვა და ტურისტების მოზიდვა სამცხე-ჯავახეთში.

საინფორმაციო ცენტრის მონაცემებით, ახალციხის ციხეს გახსნიდან დღემდე 50 000 ვიზიტორი ესტუმრა.

[თინათინ ზაზაძე, ახალციხე]