ბორჯომის ოპოზიციონერი დეპუტატები დიპლომატიური კორპუსის წარმომადგენლებს შეხვდნენ

შეხვედრა დღეს, ექვს მარტს, თბილისში „ქორთიარდ მარიოტში“ დიპლომატიური კორპუსის ინიციატივით შედგა. დეპუტატებმა დიპლომატებს ბორჯომის ადგილობრივ თვითმმართველობაში ხელფასების ზრდასთან დაკავშირებით შექმნილი ვითარების შესახებ ინფორმაცია მიაწოდეს.

„დიპლომატიური კორპუსის წარმომადგენლები დაინტერესდნენ იმის შესახებ თუ რა ხდება ბორჯომში. ჩვენ მათ მივაწოდეთ ინფორმაცია ყველა იმ საკითხთან დაკავშირებით, რაზეც შეკითხვები ჰქონდათ“, – ამბობს ბორჯომის მუნიციპალიტეტის საკრებულოს თავმჯდომარე ზაზა ჩაჩანიძე.

მასთან ერთად შეხვედრას საკრებულოს წევრი „ლეიბორისტული“ პარტიიდან გიორგი გიუაშვილი და „ევროპული საქართველოდან“ ბაქარ შირაძე ესწრებოდნენ.

„მოვუყევით დიპლომატებს თუ რა ძალადობებსაც აქვს ადგილი ბორჯომის თვითმმართველობაში. ვგულისხმობ იმას, რომ საშტატო ნუსხის დამტკიცებას გვაძალებენ. ასევე, ავუხსენით მათ თუ როგორ დავბლოკეთ უხარისხო საქალაქო ტრანსპორტის შეძენასთან დაკავშირებული პროექტი და როგორ დავზოგეთ თანხა თვითმმართველობის საკეთილდღეოდ“, – ამბობს გიუაშვილი.

საკრებულოს დეპუტატები იმედოვნებენ, რომ დიპლომატიური კორპუსის წარმომადგენლები ბორჯომში განვითარებული მოვლენებით კიდევ უფრო დეტალურად დაინტერესდებიან და შესაბამის რეაგირებასაც მოახდენენ.

„შეხვედრაზე, დიპლომატიური კორპუსის წარმომადგენლები ძირითადად საკრებულოს პროცედურული საკითხებით დაინტერესდნენ. მოლოდინი გვაქვს, რომ ისინი უფრო ღრმად ჩაერთვებიან ამ საკითხებში“,– გვითხრა ბაქარ შირაძემ.

ბორჯომის მუნიციპალიტეტის მერიაში აცხადებენ, რომ თუ დიპლომატიური კორპუსის წარმომადგენლები მათთან შეხვედრის სურვილს გამოხატავენ, მზად არიან შექმნილი ვითარების შესახებ ინფორმაცია მიაწოდონ.

[ლუბა გიორგაძე, ბორჯომი]