სამცხე–ჯავახეთის გუბერნატორი და სტუდენტები ექსპედიციას მოაწყობენ

რეგიონში არსებული ისტორიული ძეგლების მოსანახულებლად, ტური 11 ივნისს დაიწყება და ორი დღის განმავლობაში გაგრძელდება. ტურისტულ მარშრუტში შედის: საფარის მონასტერი, ოხერასა და მაჭიხეთის ეკლესიები, მუსხის სკოლა–მუზეუმი, აგარის მონასტერი, სოფელ ხეოთში წმ. ბარბარეს ეკლესია, სოფელ წინუბანში ბიეთის მონასტერი, აწყურში სლესის ციხე, აწყურის ციხე და მონასტერი.

სამცხე–ჯავახეთის გუბერნიის ინფორმაციით, ექსპედიციის მიზანია, ახალგაზრდები რეგიონის ღირსშესანიშნაობებს გუბერნატორთან ერთად გაეცნონ და არსებული ტურისტული პოტენციალი შეაფასონ.

"გარდა ძეგლების დათვალიერებისა, ტურის ფარგლებში მოხდება ისტორული ძეგლების მიმდებარე ტერიტორიების დასუფთავება, ასევე ყველა ლოკაციაზე გუბერნატორი ადგილობრივ მოსახლეობას შეხვდება, მოისმენს პრობლემურ საკითხებს და ერთად იმსჯელებენ მათი გადაჭრის გზებზე", – აცხადებენ გუბერნიაში.

ტურში მონაწილეობას სამცხე–ჯავახეთის სახელმწიფო უნივერსიტეტის დაახლოებით სამოცი სტუდენტი და პროფესორები მიიღებენ. ასევე პროექტში ჩაერთვებიან სამხარეო ადმინისტრაციის, ახალციხის მერიისა და საკრებულოს თანამშრომლები და ახალციხე–ადიგენის მაჟორიტარი დეპუტატი.

ექსპედიციის წევრები 11 ივნისს, ღამით ურავლის ხეობაში დარჩებიან, მეორე დღეს კი ტურისტულ მარშრუტს გააგრძელებენ. ორ დღიანი ტური ახალციხის ხელოვნური ტბის ტერიტორიაზე, 12 ივნისს დასრულდება და საზეიმო დახურვა გაიმართება.

[თაკო ფეიქრიშვილი, ახალციხე]