წინასაარჩევნო პერიოდის დარღვევები სამცხე–ჯავახეთში

ორგანიზაცია „სამართლიანმა არჩევნებმა“ დღეს, 17 მაისს, წინასაარჩევნო პერიოდის მონიტორინგის მეორე შუალედური ანგარიში წარადგინა. მონიტორინგი 20 აპრილიდან 11 მაისის ჩათვლით მიმდინარეობდა.

ამ პერიოდში, „სამართლიანმა არჩევნებმა“, სამცხე–ჯავახეთში რამდენიმე დარღვევა დააფიქსირა. ყველა შემთხვევაში დამრღვევი მმართველი გუნდია.

„სამართლიანი არჩევნებისა და დემოკრატიის საერთაშორისო საზოგადოების“ შიდა ქართლისა და სამცხე–ჯავახეთის რეგიონული კოორდინატორი ნინო ბიბილეიშვილი ამბობს, რომ 9 მაისს, ფაშიზმზე გამარჯვების დღესასწაულზე, ასპინძის მუნიციპალიტეტის გამგებელმა, რომელიც ასევე „ქართული ოცნების“ გამგებლობის კანდიდატია, ომის ვეტერანები მოინახულა, დაასაჩუქრა და შეჰპირდა, რომ მათ საბანკო არნგარიშზე გარკვეული თანხა ჩაერიცხებოდათ. ასევე, საჩუქრები და ფულადი დახმარება გადასცა, ამავე დღეს, ისევ ვეტერანებს, ადიგენის მუნიციპალიტეტის გამგებლის მოვალეობის დროებით შემსრულებელმა ზაქარია ენდელაძემ, რომელიც, ასევე მმართველი გუნდის გამგებლობის კანდიდატია.

„მართალია, დადგენილება, რომ ომის ვეტერანებსა და მარჩენალდაკარგულთა ოჯახებს 9 მაისისთვის დახმარება გადასცემოდათ, წინასწარ იყო მიღებული, მაგრამ, ჩვენი ორგანიზაცია მიიჩნევს, რომ მსგავსი ტიპის ღონისძიებების გამართვა უპრიანი იქნება მთელი წლის განმავლობაში, რომ ამ ოჯახებმა თავი დაცულად იგრძნონ“, – ამბობს ნინო ბიბილეიშვილი.

„სამართლიანი არჩევნების“ მეორე შუალედურ ანგარიშში მოხვდა ის შემთხვევებიც, როცა ადგილობრივ ბიუჯეტებში, არჩევნების გამოცხადებამდე რამდენიმე დღით ადრე, განხორციელდა ცვლილებები.

კერძოდ საქართველოს 57 მუნიციპალიტეტში ადგილობრივი ბიუჯეტი გაიზარდა, რასაც „სამართლიანი არჩევნები“ უარყოფითად აფასებს.
სამცხე–ჯავახეთის მასშტაბით, ბიუჯეტი ზრდის ფაქტი ბორჯომში დაფიქსირდა.

„ბორჯომის მუნიციპალიტეტის ბიუჯეტში სოციალური მიმართულებით და ინფრასტრუქტურის კუთხით მაჩვენებელი გაზრდილია“, – ამბობს ბიბილეიშვილი.

რაც შეეხება „სამართლიანი არჩევნების“ პირველ შუალედურ ანგარიშს, მასში სამცხე–ჯავახეთში მხოლოდ ერთი დარღვევაა დაფიქსირებული.

„ერთიანი ნაციონალური მოძრაობის“ მიერ ახალციხეში ჩატარებული შეხვედრა, რომელსაც „ქართული ოცნების“ წარმომადგენლებმა შეუშალეს ხელი. კერძოდ, საუბარია ახალციხეში შვიდ აპრილს მომხდარ შემთხვევაზე, როცა „ქართული ოცნების“ წარმომადგენლებმა ახალციხეში, შტაბის სამუშაო შეხვედრაზე მყოფ „ნაციონალების“ ლიდერებს ბოთლები ესროლეს.

აღსანიშნავია, რომ გარდა ბორჯომის ბიუჯეტის გაზრდისა, შუალედურ ანგარიშებში მოხვედრილი ორივე ფაქტი, ვეტერანებისთვის გადაცემული საჩუქრებიც და შტაბის მუშაობაში ხელისშეშლაც დაფიქსირებული აქვს „სამხრეთის კარიბჭეს“.

[თამარ თოთაძე, ახალციხე]