სამართლიანი არჩევნების შეფასებით ახალციხის ოლქში არჩევნებმა მშვიდად ჩაიარა

ორგანიზაცია ”სამართლიანი არჩევნების” სამცხე-ჯავახეთისა და ქვემო ქართლის კოორდინატორის ნინო ბიბილეიშვილის თქმით, ორგანიზაციას ახალციხის ოლქის უბნებზე საჩივრები არ დაუწერია. შედარებით მეტი დარღვევა დაფიქსირდა #40 ახალქალაქის ოლქში, წვრილმანი დარღვევები იყო ასპინძაშიც.

”ახალქალაქში, მე-9 უბანზე, ალასტანში, არ ხდებოდა მარკირება, პირადობის გარეშე ხდებოდა ხმის მიცემა, კომისიის წევრები თვითონ ხაზავდნენ ბიულეტენს. როცა საჩივრის დაწერა გადავწყვიტეთ, ზეწოლა იყო ჩვენს დამკვირვებელზეც. შემდგომ ჩვენი მობილური ჯგუფი ავიდა და მოვითხოვეთ უბნის გაბათილება”, - ამბობს იგი.

რაც შეეხება ასპინძას, ბიბილეიშვილის თქმით, მათ საჩივარი დაწერეს იმ ფაქტზე, რომ სოფელ ხიზაბავრაში კომისიის წევრი ამომრჩეველს არ უკეთებდა მარკირებას: ”მას ისეც მიღებული ჰქონდა გაფრთხილება და საჩივრის შემდგომ უფლებამოსილება შეუჩერდა”.

ბიბილეიშვილის თქმით, ზოგადად, მთელი საქართველოს მასშტაბით და მათ შორის, ახლციხეშიც უბნებზე ამომრჩეველთა რაოდენობაზე გაცილებით ნაკლეი ბიულეტენები იყო. გარდა ამისა, ბევრი უბანი პატარა ოთახში იყო განთავსებული, რაც დამკვირვებლებს პროცესის სრულყოფილად დაკვირვების საშუალებას არ აძლევდა.

”ახალციხეში სერიოზული დარღვევები არ ყოფილა”, - განაცხადა ნინო ბიბილეიშვილმა.

[ნინო ნარიმანიშვილი, ახალციხე]