'სამართლიანმა არჩევნებმა' მესამე შუალედური ანგარიში გამოაქვეყნა

„სამართლიანი არჩევნებისა და დემოკრატიის საერთაშორისო საზოგადოებამ“ 2014 წლის 15 ივნისის ადგილობრივი თვითმმართველობების არჩევნების მონიტორინგის მესამე შუალედური ანგარიში დღეს, 6 ივნისს გამოაქვეყნა.

ანგარიში მოიცავს 11 მაისიდან 1 ივნისის ჩათვლით პერიოდს. როგორც ორგანიზაციაში აცხადებენ, საანგარიშო პერიოდში მნიშვნელოვან ტენდენციას წარმოადგენდა სავარაუდო ზეწოლა თვითმმართველობის არჩევნებში მონაწილე ოპოზიციური პარტიების კანდიდატებზე.

„1 ივნისის მონაცემებით, 62 საარჩევნო ოლქში კანდიდატურები მოხსნა 385-მა კანდიდატმა. პოლიტიკური გაერთიანებებისა და ადგილობრივი დამკვირვებლებისაგან მიღებული ინფორმაციით, 6 ოპოზიციური პარტიის ორმოცდაათამდე კანდიდატმა მოხსნა კანდიდატურა სავარაუდო ზეწოლის შედეგად“, –ამბობს „სამართლიანი არჩევნების“ აღმასრულებელი დირექტორი ნინო ლომჯარია.

ანგარიშში მოხვდა კანდიდატის წინასაარჩევნო კამპანიისთვის ხელის შეშლის მიზნით ზეწოლა-მუქარის 1 ფაქტი; სავარაუდო პოლიტიკური ნიშნით სამსახურიდან გათავისუფლების 3 ფაქტი; ადმინისტრაციული რესურსის გამოყენების 2 ფაქტი.

გარდა ამისა, ანგარიშში მოხვდა პოლიტიკური ნიშნით განხორციელებული ფიზიკური ძალადობის 1 ფაქტი, როდესაც „ერთიანი ნაციონალური მოძრაობის“ ერთ-ერთ ლიდერს მისი პოლიტიკური საქმიანობის გამო ფიზიკურად გაუსწორდნენ. ასევე, დაფიქსირდა კოალიცია „ქართულ ოცნებასა“ და „ერთიანი ნაციონალური მოძრაობის“ წევრებსა თუ მხარდამჭერებს შორის ფიზიკური დაპირისპირების 4 ფაქტი.

„სამართლიანი არჩევნების“ კოორდინატორებმა დააფიქსირეს ჰომოფობიური განცხადების 3 შემთხვევა -, 2 „ლეიბორისტული პარტიის“ კანდიდატების, 1 - ბლოკი „ბურჯანაძე - ერთიანი ოპოზიციის“ მხრიდან.

„მიგვაჩნია, რომ აღნიშნული განცხადებებით ხდება სიძულვილის გაღვივება საზოგადოებაში, რაც დაუშვებლად და საგანგაშოდ მიგვაჩნია“– ნათქვამია ანგარიშში.

„სამართლიანი არჩევნების“ კოორდინატორები 2014 წლის 12 მაისიდან 1 ივნისამდე საარჩევნო სუბიექტების მიერ გამართულ 1181 საჯარო შეხვედრას დაესწრნენ. აღნიშნული შეხვედრებიდან კოალიცია „ქართულმა ოცნებამ“ გამართა 586 შეხვედრა, „ერთიანმა ნაციონალურმა მოძრაობამ“ - 271, „ნინო ბურჯანაძე-ერთიანმა ოპოზიციამ“ - 128; „არასაპარლამენტო ოპოზიციამ“ (კახა კუკავა, ფიქრია ჩიხრაძე)“ - 46; „საქართველოს ლეიბორისტული პარტიამ“ - 36; „საქართველოს გზამ“- 29; საქართველოს პატრიოტთა ალიანსმა“- 28; „თვითმმართველობა ხალხს“- 9; „ხალხის პარტიამ“ - 6; „მწვანეთა პარტიამ“- 5; „ირაკლი ოქრუაშვილი - ქართული პარტიამ“ – 5.

„სამართლიანი არჩევნები“ დაკვირვებას საქართველოს ყველა საარჩევნო ოლქში 73 გრძელვადიანი დამკვირვებლის მეშვეობით ახორციელებს.

[Sknews.ge]