„ოცნების“ გამგებლობის კანდიდატების საჩუქრები ვეტერანებს
დღეს 9 მაისს, ფაშიზმზე გამარჯვების 69–ე წლისთავთან დაკავშირებით, მეორე მსოფლიო ომის ვეტერანებს ადიგენის მუნიციპალიტეტის გამგებელმა ზაქარია ენდელაძემ 50-50 ლარი ხელზე გადასცა და სპეციალურად მოწყობილ სადილზე მიიწვია. ასპინძის მუნიციპალიტეტის გამგებელმა ლევან ცაბაძემ კი მათ ფაშიზმზე გამარჯვება შამპანურითა და შოკოლადით მიულოცა. რაც შეეხება ფულად თანხას, როგორც ცაბაძე ამბობს, ყველა ვეტერანს დაჰპირდა, რომ ერთჯერადად 250 ლარი საპენსიო ბარათებზე დაერიცხებათ.
ადიგენში 16 ვეტერანია, თუმცა, სკვერში მოწყობილ საზეიმო ცერემონიას მხოლოდ 8 დაესწრო.
„ერთ-ერთ მათგანს 100 წლის ვეტერანს არალში პირადად ვესტუმრე და გადავეცი 50 ლარი“, - ამბობს ზაქარია ენდელაძე და ამატებს, რომ თანხა აღნიშნული ღონისძიებისა და ერთჯერადი დახმარებისთვის ბიუეჯტში წინასწარ იყო გაწერილი.
საჩუქრების პირადად გადაცემა 3 ვეტერანთან მოუხდა ლევან ცაბაძეს. ასპინძის მუნიციპალიტეტში 10 ვეტერანიდან კულტურის სახლში დაგეგმილ ღონისძიებაზე 7 მივიდა.
„სახლში ვისთანაც მივედი, გადავეცი შამპანური, შოკოლადი, მისალოცი ბარათი და ვაცნობე, რომ საპენსიო ბარათზე დაუჯდებოდათ ფული, 250 ლარი“, - გვიხსნის ცაბაძე.
მისი თქმითაც, თანხა, რომელიც ვეტერანებს დაერიცხებათ, ბიუჯეტში თავიდანვე იყო გათვალისწინებული. რაც შეეხება საჩუქრებს, ცაბაძის მოადგილე ალექსანდრე პაპაშვილი გვიხსნის, რომ ეს თანხა წარმომადგენლობითი ხარჯისთვის გაწერილი მუხლიდან გამოიყენეს.
„ამ ფულს ძირითადად „შოთაობისთვის“ ვხარჯავთ ხოლმე, მაგრამ დღეს 9 მაისის ღონისძიებისთვის მოვაკელით ცოტა“, - გვითხრა პაპაშვილმა.
ზაქარია ენდელაძე: „ვერავინ ჩამითვლის ამას ადმინისტრაციული რესურსის გამოყენებად“
„ქართულმა ოცნებამ“ ასპინძის მუნიციპალიტეტში გამგებლობის კანდიდატად ლევან ცაბაძე 5 მაისს წარადგინა, ადიგენის მუნიციპალიტეტში ზაქარია ენდელაძე კი 6 მაისს. ამ დროისთვის ორივე მათგანი მოქმედი გამგებელიცაა, კანონი აძლევთ ამის უფლებას და შვებულებაში გასვლას არც ჩქარობენ.
კითხვაზე, აღიქმება თუ არა ამომრჩევლის მოსყიდვად, დასახელებული საარჩევნო კანდიდატის მიერ, ფულისა და ფასიანი საჩუქრების ვეტერანებისთვის გადაცემა, ენდელაძე გვპასუხობს: „ინდივიდუალურად შეიძლება ეს ასეც იფიქროს ვინმემ, მაგრამ სამართლებრივად კანონთან წინააღმდეგობაში არ მოდის. გამგებლის მოვალეობის შემსრულებელი ვარ და ვასრულებ ჩემზე დაკისრებულ მოვალეობას. არ ჩამიტარებია რაიმე საარჩევნო პროპაგანდა. ამიტომ ვერავინ ჩამითვლის ამას ადმინისტრაციული რესურსის გამოყენებაში“.
იურისტების შეფასებით, კანდიდატები არაკეთილსინდისიერად მოიქცნენ
გამგებლების ქმედება, რომ კანონთან წინააღმდეგობაში არ მოდის, ამაზე საარჩევნო საკითხებში ექსპერტები და არასამთავრობო ორგანიზაციების წარმომადგენლებიც საუბრობენ. თუმცა, მათივე განცხადებით, „ქართული ოცნების“ კანდიდატები არაკეთილსინდისიერად მოიქცნენ, რადგან, როცა წინასაარჩევნოდ ადმინისტრაციული რესურსის გამოყენებაზეა საუბარი, არ არის აუცილებელი კანონი დაირღვეს.
მათი განცხადებით, როცა არათანაბარ პირობებში არიან კანდიდატები, ეს უკვე დარღვევაა და ამიტომ, მიუხედავად იმისა, რომ შეზღუდვა არ არსებობს, გამგებლები შვებულებაში მაინც უნდა გასულიყვნენ: „თუ ამის საშუალებას, მაგალითად ტენდერები არ აძლევთ, მაშინ მსგავს ღონისძიებებში მაინც არ უნდა მიიღონ მონაწილეობა, რადგან ეს არის ძალიან ცუდად გამოყენება კანონის რეგულაციის. ეს არის ერთგვარი ხრიკი და ფანდი. ეს არის თანამდებობის ბოროტად გამოყენება, თუმცა არა კანონის დარღვევის ხარჯზე“.
როცა კანდიდატებს საარჩევნო მიზანი უკვე საჯაროდ გაცხადებული აქვთ, მათი ქმედება რომ წინასაარჩევნო კამპანიად აღიქმება, ამაზე „საერთაშორისო გამჭვირვალობა - საქართველოს“ იურისტი გიგი ჩიხლაძეც საუბრობს.
„წინასაარჩევნო კამპანიის დროს, როდესაც თვითონ აცხადებენ, რომ იყენებენ ბიუჯეტით გამოყოფილ თანხას თავის პოპულარიზაციისთვის, ეს უკვე ნიშნავს იმას, რომ ადმინისტრაციულ რესურსებს იყენებენ“, - აცხადებს ჩიხლაძე.
[თამუნა უჩიძე, ახალციხე]