რას ჰპირდებიან ამომრჩევლებს „ოცნების“ გამგებლობის კანდიდატები მესხეთში

დიმიტრი ყიფიანი – "ქართული ოცნების" გამგებლობის კანდიდატი ბორჯომში

„ქართული ოცნების“ გამგებლობის კანდიდატი ბორჯომის მუნიციპალიტეტში დიმიტრი ყიფიანი მოსახლეობას ტაძრისში, დვირში, საკირეში, წაღვერსა და ყვიბისში უკვე შეხვდა.

„დარჩენილი გვაქვს ბაკურიანი, ციხისჯვარი, ტაბაწყური, ბალანთა, მოლითი და ასევე, ყვიბისის თემში შემავალი სოფლები“, - ამბობს იგი.

ყიფიანის თქმით, მისი საარჩევნო პროგრამის ძირითადი აქცენტი ბორჯომისთვის კურორტის სტატუსის დაბრუნებაა: „ამიტომ უნდა განხორციელდეს მუნიციპალიტეტში არაერთი ინფრასტრუქტურული პროექტი, საბოლოოდ მოგვარდეს წყლის პრობლემა და რეაბილიტაცია ჩაუტარდეს სკვერებს“.

ყიფიანი ამბობს, რომ გამარჯვების შემთხვევაში, მუნიციპალიტეტის გამგეობაში შესაძლოა არა ერთი სამსახური გააუქმოს, მათი ნაწილი კი პირიქით, გააფართოვოს: „ჩვენი მთავარი მოთხოვნა პროფესიონალიზმი და შრომისმოყვარეობა იქნება“.

ყიფიანს ბორჯომის მუნიციპალიტეტში ოთხი კონკურენტი ჰყავს, თუმცა ამბობს, რომ თავად არცერთი მათგანი კონკურენტად არ მიაჩნია: „დიდი ალბათობით გავიმარჯვებ. ამის თქმის საფუძველს ბორჯომის მუნიციპალიტეტში ჩატარებული წინასწარი გამოკითხვებიც მაძლევს“.

გამარჯვებაში დარწმუნებულია ასპინძაში „ქართული ოცნების“ გამგებლობის კანდიდატი ლევან ცაბაძეც. ისევე როგორც ყიფიანი, ისიც აცხადებს,რომ ასპინძაში კონკურენტი არ ჰყავს.

„კარდაკარ დავდივარ და ყველა ოჯახს ვხვდები. უკვე ვიყავი თოკში, ვარგავში, ორგორაში, სახუდაბელსა და ხერთვისში. 15 ივნისამდე ყველა სოფელს შემოვივლი“, - აცხადებს ცაბაძე.

მისი თქმით, ასპინძაში ყველა შეჩერებული პროექტი დასრულდება, ყველა სოფლამდე მივა გზა, ასევე ყველა სოფელს ექნება გაზი და სარწყავი სისტემა: „ასპინძის მუნიციპალიტეტისთვის მთავარი პრიორიტეტი სოფლის მეურნეობაა. ამიტომ ვეცდებით ამ დარგის განვითარებას და ამავე მიმართულებით ასპინძაში ქარხნების აშენებას“.


ლევან ცაბაძე – „ქართული ოცნების“ გამგებლობის კანდიდატი ასპინძაში

ადიგენის მუნიციპალიტეტში „ქართული ოცნების“ გამგებლობის კანდიდატის ზაქარია ენდელაძის მთავარი მიზანი მუნიციპალიტეტისთვის შემოსავლების გაზრდაა.

„ადიგენის მუნიციპალიტეტის შიდა შემოსავლები 355 000 ლარია. რა უნდა გააკეთო ამ თანხით იმ რაიონში, რომლის ტერიტორიაც 800 კვ. კილომეტრია და რომელშიც 22 000 ადამიანი ცხოვრობს“, - ამბობს ენდელაძე და ამატებს, რომ ეცდება ადიგენის მუნიციპალიტეტში რაიმე საწარმო ააშენოს.

მისივე თქმით, კოალიცია „ქართულ ოცნებაში“ ბევრი პროგრესულად მოაზროვნე ადამიანია და ამიტომ ფიქრობს, რომ მათი გვერდში დგომით ყველა დასახულ მიზანს მიაღწევს.

ენდელაძემ ადიგენის მუნიციპალიტეტის ყველა სოფელი უკვე შემოიარა, თუმცა ამბობს, რომ მოსახლეობასთან შეხვედრებს ჯერ კიდევ აგრძელებს.

„ადიგენში სამი გამგებლობის კანდიდატია, მაგრამ დარწმუნებული ვარ, რომ გავიმარჯვებ, რადგან ვფიქრობ, რომ უკონკურენტო ვარ“, - აცხადებს ენდელაძე.


ზაქარია ენდელაძე – „ქართული ოცნების“ გამგებლობის კანდიდატი ადიგენში

(R)

[sknews.ge]