ადიგენში „ქართული ოცნების“ გამგებლობის კანდიდატი ზაქარია ენდელაძეა

ადიგენის მუნიციპალიტეტის გამგებლობის კანდიდატად „ქართულმა ოცნებამ“ ზაქარია ენდელაძე დაასახელა. ენდელაძე ადიგენში გამგებლის მოვალეობას მიმდინარე წლის 26 თებერვლიდან ასრულებს.

ამომრჩევლებს ენდელაძე გამგებლობის კანდიდატად პარლამენტის წევრებმა: გიორგი ვოლსკიმ და თემურ ხუბულურმა წარუდგინეს. ღონისძიებას სამცხე-ჯავახეთის გუბერნატორი აკაკი მაჭუტაძე და ახალციხის მერობის კანდიდატი გიორგი კოპაძეც ესწრებოდნენ.

ვიდრე სიტყვას გამგებლობის კანდიდატს გადასცემდნენ, „ქართული ოცნების“ მხარდამჭერებს ჯერ ხუბულურმა მიმართა და ქვეყანაში ხელისუფლების შეცვლის შემდეგ ხალხის დიქტატურისგან გათავისუფლებაზე ესაუბრა. შემდეგ კი, გიორგი ვოლსკიმ ადგილობრივი თვითმმართველობის რეფორმის შედეგებზე გაამახვილა ყურადღება.

„ამომრჩევლებს შეუძლიათ საკადრო ცვლილებებისკენ მოუწოდონ საკრებულოს. არა ერთი ადამიანის, არამედ ხალხის ხელში იქნება ძალაუფლება“, - აცხადებს ვოლსკი.

მის შემდეგ, ტრიბუნა ზაქარია ენდელაძემ დაიკავა. გამგებლობის კანდიდატმა საუბარი „ოცნების“ გაკეთებული საქმეებით დაიწყო: „სოფლად აღარ არსებობს მიწის დამუშავებისა და მოსავლის აღების, ასევე დაბინავების შიში. „ოცნებამ“ გაათავისუფლა სასამართლო წნეხისგან. პოლიცია ჩადგა ხალხის სამსახურში. ადამინები ღიად და უშიშრად გამოხატავენ საკუთარ მოსაზრებებს, არავინ ატერორებს ბიზნესს, შეწყდა არაადამიანური მოპყრობის პრაქტიკა ციხეებში“.

ენდელაძემ ადიგენის მუნიციპალიტეტში განხორციელებული და განსახორციელებელი პროექტების შესახებაც ისაუბრა და მოსახლეობას არსებული პრობლემების მოგავარებას მაჟორიტარი დეპუტატობის კანდიდატებთან ერთად დაპირდა.

მან დაბა ადიგენში მაჟირიტარ დეპუტატად ნუგზარ ხაშიბაძე წარადგინა, დანარჩენი 14 მაჟორიტარის სია კი ასეთია: დაბა აბასთუმანი - ნანა ბარბლიშვილი, არალი - თამაზ აკოფაშვილი, უდე - ვაჟა ობოლაშვილი, ვარხანი - გიორგი მინაძე, ბოლაჯური - კობა ჩხიტუნიძე, ბენარა- ალექსანდრე ენდელაძე, ლელოვანი - ნუკრი ხვედელიძე, გორგული - ნინა სტეფანოვა, ჩორჩანი - მუხრან ხარშილაძე, ზანავი - ბაგრატ ხოზრევანძე, მოხე - ავთანდილ გობაძე, ჭეჭლა -ასლან ქედელიძე, ფხერო - ნოდარ გაგნიძე, მლაშე - შალვა გავაშელი.

ყოფილი პრემიერის ვანო მერაბიშვილის მშობლიურ სოფელში უდეში „ქართული ოცნების“ მაჟორიტარობის კანდიდატი გამარჯვებაში დარწმუნებულია, სოფელში სიტუაცია შეცვლილია და იმიტომ.

გამარჯვებაში ეჭვი არ ეპარება არც არლის მაჟორიტარობის კანდიდატს. ორივეს ერთად კი რიგით პირველ პრობლემად სოფლებში გაზიფიცირება, უმუშევრობა და სარწყავი სისტემის მოწესრიგება მიაჩნიათ. ამ ყველაფერთან ერთად, მუნიციპალიტეტის მასშტაბით პირველ პრიორიტეტად ადიგენის გამგებლობის კანდიდატი საწარმოს ფუნქციონირებასაც ასახელებს.

ამავე თემაზე იხილეთ ვიდეომასალა.
[sknews.ge]