კოალიციის აქტივისტები ამბობენ, რომ საქმიანობაში სპეციალურად შექმნილი ჯგუფები უშლიან ხელს. ისინი უკან დაყვებიან და ცდილობენ მოსახლეობა მათ წინააღმდეგ აამხედრონ.
- ”იკრიბებიან ჯგუფები და უკან დაგვყვებიან. შეურაცხყოფას გვაყენებენ. გვეუბნებიან, აქ უკვე ჩაატარეს გამოკითხვა, მეტი საჭირო აღარ არისო”, - ამბობს ”კარდაკარის” ერთ-ერთი მონაწილე ზაზა კახაძე.
”ქართული ოცნების” ასპინძის შტაბის ხელმძღვანელი ტარიელ ივანიშვილი ამ ფაქტს ასპინძის მუნიციპალიტეტის გამგებელს უკავშირებს. მისი მტკიცებით, ბესო ბექაური, რომელიც წარმოშობით სოფელ რუსთავიდანაა, ადგილობრივებს აფრთხილებს ”ქართული ოცნების” აქტივისტები სოფელში არ შეუშვან.
ასპინძის მუნიციპაიტეტის გამგებელი ბესო ბექაური ტარიელ ივანიშვილის ბრალდებას კატეგრიულად უარყოფს.
- ”ჩვენ არავის არაფერში არ ვუშლით ხელს. მსგავსი არაფერი მომხდარა”, - განაცხადა ბექაურმა სატელეფონო საუბარში.
”ქართული ოცნების” წარმომადგენლებმა სოფელ რუსთავში 50 ოჯახი გადაამოწმეს. ადგილობრივები ამბობენ, რომ კოალიციის აქტივისტებისთვის მუშაობაში ხელი არ შეუშლიათ.
- ”ჩემს ოჯახში ჩვეულებრივად მივიღე. ჩაატარეს გამოკითხვა და წავიდნენ. ასე მოიქცნენ ჩემი მეზობლებიც”, - ამბობს სოფელ რუსთავის მკვიდრი მარინა შავაძე.
ერთ-ერთი ადგილობრივი, რომელიც ვინაობის გამხელისგან ჩვენთვის გაურკვეველი მიზეზის გამო თავს იკავებს, ამბობს, რომ ”ქართული ოცნების” აქტივისტები ადგილობრივებს აიძულებენ პოლიტიკური განწყობა დააფიქსირონ.
- ”ხალხს აძალებენ, თქვით, ვის უნდა მისცეთ ხმაო. მაინტერესებს, როდესაც გადამოწმება ხდება, ასეთი დაჟინება შეიძლება თუ არა”, - ამბობს იგი.
კოალიციის აქტივისტებს მუშაობაში ხელს რომ არავინ უშლის, ამის შესახებ რუსთავში მცხოვები ვაჟა ძირკვაძეც საუბრობს.
- ”ყველას წინასწარ დავურეკე, რომ მოსულიყვნენ და მოსახლეობას გასაუბრებოდნენ, გამარჯვების შემთხვევაში სოფლისთვის რას გააკეთებდნენ. მაგრამ არ მოვიდნენ. არ უნდათ ხალხთან ურთიერთობა და ჩვენ რა შუაში ვართ”, -ამბობს იგი.
”ქართული ოცნების” აქტივისტები ადგილობრივების მტკიცებას უარყოფენ და ამბობენ, რომ ხელი ნამდვილად ეშლებათ.
ადგილობრივებსა და ”კარდაკარის” წევრებს შორის სიტუაცია მაშინაც დაიძაბა, როცა ვითარების გასარკვევად სოფელ რუსთავს ”სამხრეთის კარიბჭე” ესტუმრა. ჩვენი სტუმრობის შემდეგ თითქმის მთელი სოფელი შეიკრიბა და საუბარი აქტივისტებსა და ადგილობრივებს შორის სიტყვიერ დაპირისპირებაში გადაიზარდა. სიტუაცია განსაკუთრებით მას შემდეგ დაიძაბა, რაც მოულოდნელად ჟურნალისტების ჯგუფი გამოჩნდა. მათ ადგილობრივებს ”რეალ-ტვ”-ის კორესპონდენტებად წარუდგინეს თავი და ცდილობდნენ გაერკვიათ რას უხდიან მოვალეობის შესრულებაში ”ქართული ოცნების” აქტივისტებს.
ამ ეტაპზე ”ქართული ოცნების” წარმომადგენლები ”კარდაკარს” ასპინძის მუნიციპალიტეტის სოფელ დამალაში ატარებენ. უახლოეს დღეებში კი ისინი სოფლებს: თოკსა და ვარგავს ესტუმრებიან.
ასპინძის შტაბის ხელმძღვანელი ტარიელ ივანიშვილი ამბობს, რომ სოფელ რუსთავში სიებს ის თავად გადაამოწმებს.
- ”ვაპირებ პირადად ჩავიდე ამ სოფელში, გავესაუბრო ხალხს და ჩავატარო კარდაკარი”, - აცხადებს იგი.
[sknews.ge]