”ქართული ოცნების” ადიგენელ აქტივისტს ფიზიკური შეურაცხყოფა მიაყენეს

შემთხვევა რამდენიმე წუთის წინ მოხდა. ”ქართული ოცნების” ადიგენის რაიონული შტაბის წევრი ბესო მუმლაძე ადიგენის მუნიციპალიტეტის სოფელ ვარხანში ”კარდაკარზე” დადიოდა და ამომრჩეველთა სიებს ამოწმებდა.

როგორც თავად ამბობს, ერთ-ერთმა ადგილობრივმა მას მკერდზე დამაგრებული ”ქართული ოცნების” ბაჯი ჩამოგლიჯა.

”კარდაკარის” ანკეტაში არის კითხვა იმის შესახებ თუ რომელი პოლიტიკური ძალის მხარდამჭერები არიან. მისი გაღიზიანება სწორედ ამ კითხვას მოჰყვა. მომედავა, რომ ეს უკანონობა იყო, მომვარდა და ბაჯი ჩამომგლიჯა. ვინ იყო არ ვიცი”, - ამბობს ბესო მუმლაძე.

მისივე თქმით, ინციდენტს ადიგენის მუნიციპალიტეტის გამგებელი სიმონ პარუნაშვილიც შეესწრო.

”სამხრეთის კარიბჭე” სიმონ პარუნაშვილს დაუკავშირდა. ”ავიარე მაგ სოფელში, მაგრამ არაფერი დამინახავს”, - გვითხრა გამგებელმა სატელეფონო საუბარში.

დაწვრილებით ინფორმაციას ”სამხრეთის კარიბჭე” მოგვიანებით მოგაწვდით.

[sknews.ge]