ბორჯომში "ქართული ოცნების' გამგებლობის კანდიდატი დიმიტრი ყიფიანია

ბორჯომის ცენტრალური პარკის დარბაზში შეკრებილ ადგილობრივებს საარჩევნო კანდიდატები საქართველოს პარლამენტის წევრმა გიორგი ვოლსკიმ და ბორჯომის მაჟორიტარმა დეპუტატმა გედევან ფოფხაძემ წარუდგინეს. ტრადიციულად, შეხვედრას ესწრებოდა სახელმწიფო რწმუნებული სამცხე–ჯავახეთის მხარეში აკაკი მაჭუტაძე.

„ის პასუხისმგებლობის დიდი გრძნობითა და სამშობლოსადმი დიდი სიყვარულით გამოირჩევა. მას აქვს ყველა მონაცემი იმისთვის, რომ მოიპოვოს ხალხის სიყვარული“, - ასე დაახასიათა ვოლსკიმ დიმიტრი ყიფიანი.
გიორგი ვოლსკის შემდეგ ტრიბუნა ბორჯომის მუნიციპალიტეტის გამგებლობის კანდიდატს დიმიტრი ყიფიანს დაეთმო. გამგებლობის კანდიდატმა დარბაზში შეკრებილებს ხელისუფლების შეცვლის შემდეგ ქვეყანაში მიმდინარე სასიკეთო მოვლენები შეახსენა და იქვე სამომავლო გეგმებს შეეხო. ყიფიანმა განაცხადა, რომ ერთ–ერთი პრიორიტეტი ბაკურიანის განვითარება იქნება.

„ეს უნიკალური ადგილი დღემდე უპატრონო ბავშვივითაა მიტოვებული. მიმდინარე წელს გაკეთდება რამდენიმე ქუჩა, პარკი, კეთილმოეწყობა ეკლესიის მიმდებარე ტერიტორია – ის ადგილია, სადაც ნოდარ ქუმარიტაშვილის საფლავია. გარდა ამისა, ბორჯომში დაგეგმილია ბაგა-ბაღების სრული რეაბილიტაცია, განახლდება ბორჯომის ავტოპარკი, არ დარჩება არცერთი ქუჩა, უბანი, სადაც არ იქნება გზა და განათება“, – განაცხადა ყიფიანმა.

გამგებლობის კანდიდატი დავით კოდუას ცემის ფაქტს გამოეხმაურა და განაცხადა, რომ კარგი იქნება თუ სამართლიანობის აღდგენა ქუჩაში არ გადაინაცვლებს: „იმედი მაქვს, რომ მსგავსი ფაქტი აღარ განმეორდება და სამართლიანობის აღდგენა გაგრძელდება იქ, სადაც უნდა იყოს ცივილურ ქვეყანაში“.

გამგებლობის კანდიდატმა წარუდგინა შეკრებილებს მუნიციპალიტეტის თემების მაჟორიტარები. 11 მაჟორიტარიდან 10 მამაკაცია.

ბორჯომში მაჟორიტარობის კანდიდატი ზაზა ჩაჩანიძეა, ახალდაბაში გოჩა ბლიაძე, სოფელ ტბაში არჩილ აბრამაშვილი, ყვიბისის თემში ლევან ბლიაძე, დვირის თემში ელზა კუჭუხიძე, ციხისჯვარის თემში დავით კამკამიძე, წაღვერის თემში ალექსი გელაშვილი, ბაკურიანში ზურაბ კურტანიძე, ტაბაწყურის თემში ანდრანიკ შაინიანი, სოფელი ბალანთაში არაიკ ანტონიანი, ტაძრისში კი გიორგი ფერაძე.
ამომრჩევლებს სამომავლო გეგმებზე ესაუბრნენ მაჟორიტარობის კანდიდატებიც.



„ძალიან კარგი გუნდია, მთავარია დაპირებებს როგორ შეასრულებენ“, - გვითხრა ადგილობრივმა სალომე ანთაძემ.

ამავე თემაზე იხილეთ ვიდეომასალა. (R)

[SKnews.ge]