ადიგენის ახალი გამგებელი იქამდე შეარჩიეს, ვიდრე ყოფილი გამგებლის საქმეზე სასამართლო განაჩენს გამოაცხადებს

ზაქარია ენდელაძე

დღეს, 26 თებერვალს, ადიგენის მუნიციპალიტეტის გამგებლის მოადგილედ, ზაქარია ენდელაძე დაინიშნა. გასული წლის სექტემბრამდე ეს პოსტი რატი ტატალაშვილს ეკავა. თუმცა, ახლა იგი ადიგენის მუნიციპალიტეტის ყოფილი გამგებელთან, სიმონ პარუნაშვილთან ერთად, სისხლის სამართლის პასუხისგებაშია მიცემული.

ზაქარია ენდელაძე ადიგენის მუნიციპალიტეტის სოფელ ხევაშენიდანაა.1999 წელს ივ. ჯავახიშვილის სახელობის თსუ-ს მესხეთის ფილიალში ისტორიის ფაკლულტეტი დაამთავრა. 1999 წლიდან 2004 წლამდე, შინაგან საქმეთა სამინისტროს სხვადასხვა ორგანოებში, სხვადასხვა თანამდებობებზე მუშაობდა. 2004 წლიდან 2007 წლამდე იურიდიულ ფაკუკლტეტზე სწავლობდა. 2004 წლიდან დღემდე კი ადვოკატთა ასოციაციის წევრი იყო და დედაქალაქში საქმიანობდა.

„ახლა შევიწყვეტ ადვოკატთა ასოციაციაში უფლება-მოსილებას“, - გვითხრა ზაქარია ენდელაძემ.

ენდელაძე ადიგენის მუნიციპალიტეტის გამგებლის მოადგილის მოვალეობის შესრულებას ხვალიდან, 27 თებერვლიდან შეუდგება. 28 თებერვალს კი გამგებლის მოვალეობის შესრულებაზე უარს არსენ ბალახაშვილი იტყვის. მას გასული წლის სექტემბრამდე, ანუ მანამდე, სანამ ადიგენის მუნიციპალიტეტის გამგებელს სიმონ პარუნაშვილს დააკავებდნენ, ადიგენის მუნიციპალიტეტის გამგებლის მოადგილის თანამდებობა ეკავა, პარუნაშვილის დაკავების შემდეგ კი გამგებლის მოვალეობას ასრულებს.

„ბალახაშვილი გადადგომაზე განცხადებას 28-ში დაწერს“, - ამბობს ადიგენის მუნიციპალიტეტის საკრებულოს თავმჯდომარე გივი ენდელაძე.

მიზეზი თუ რატომ წერს ბალახაშვილი განცხადებას გადადგომის შესახებ, ენდელაძე არ აკონკრეტებს: „ალბათ განცხადებაში დაწერს ყველაფერს“.


გამგებლის მოვალეობის ამჟამინდელი შემსრულებელი არსენ ბალახაშვილი

ბალახაშვილის გადადგომის შემდეგ დღის წესრიგში ავტომატურად დადგება გამგებლის ახალდანიშნული მოადგილის, ზაქარია ენდელაძის დანიშვნა გამგებლის მოვალეობის შემსრულებლად.

„კანონი მავალდებულებს, რომ მოვალეობა გამგებლის მოადგილემ შეასრულოს“, - აცხადებს ენდელაძე.

არსენ ბალახაშვილი ინფორმაციას იმის შესახებ, რომ გამგებლის მოვალეობის შესრულებაზე უარს ამბობს, არ ადასტურებს: „ჯერჯერობით აქ ვარ, არსად მივდივარ და მომავალში რა იქნება, არ ვიცი“.

„ნაციონალური მოძრაობის“ ადიგენის რაიონულ ორგანიზაციაში კი პოლიტიკურ ზეწოლაზე საუბრობენ. ადიგენი რეგიონში ერთადერთი მუნიციპალიტეტია, სადაც „ქართული ოცნების“ ხელისუფლების სათავეში მოსვლის შემდეგ ადგილობრივ თვითმმართველობაში საკადრო ცვლილებები არ განხორციელებულა.

„არსენზე ზეწოლა ხორციელდება, ასე რომ არ იყოს, რატომ იტყოდა გამგებლის მოვალეობის შესრულებაზე უარს?! ახალდანიშნული ზაქარია ენდელაძე კი „ოცნების“ მხარდამჭერია“, - ამბობს „ნაციონალური მოძრაობის“ ადიგენის რაიონული ორგანიზაციის თავმჯდომარე, ადიგენის ყოფილი გამგებელი, სიმონ პარუნაშვილი.


ადიგენის ყოფილი გამგებელი სიმონ პარუნაშვილი

მას ეთანხმება ადიგენის მაჟორიტარი დეპუტატი „ნაციონალური მოძრაობიდან“ ზურაბ ჩილინგარიშვილიც: „20 დღეში სასამართლოს გადაწყვეტილება გახდება ცნობილი და ახლა ნიშნავენ ახალ გამგებელს?! იქნებ გამამართლებელი განაჩენი გამოაქვს სასამართლოს და ყველა თანამშრომელს გამგეობაში აბრუნებენ?! ეს ხომ ნიშნავს იმას, რომ სასამართლოზე ზეწოლა ხორციელდება და მისი გადაწყვეტილებაც უკვე წინასწარ იციან?! წინააღმდეგ შემთხვევაში, ახალ კადრს არ მიიღებდნენ“.

ჩილინგარიშვილიც დარწმუნებულია, რომ ზაქარია ენდელაძე „ოცნების“ რიგებიდანაა“: „ნაციონალი“ რომ ყოფილიყო, მისი დანიშვნის შესახებ აუცილებლად მკითხავდნენ“.

ღიად დატოვეს „სამხრეთის კარიბჭეს“ კითხვა ზაქარია ენდელაძის პარტიული კუთვნილების შესახებ არსენ ბალახაშვილმა, გივი ენდელაძემ და თავად ზაქარია ენდელაძემაც.

„ამაზე ვერაფერს გიპასუხებთ“, - გვითხრა გამგეობის ახალდანიშნულმა თანამშრომელმა.

მიუხედავად იმისა, რომ იგი ადიგენის მუნიციპალიტეტის გამგებლის მოადგილედ დანიშნეს, დაბაში იციან, რომ დღეიდან მუნიციპალიტეტს ახალი გამგებელი ჰყავს.

„დღეს ახალი გამგებელი მოსულა, არ ვიცნობ ვინ არის, მაგრამ ამბობენ, რომ ადგილობრივია“, - გვითხრა ადიგენში მცხოვრებმა ივანე შევჩენკომ.

[თამუნა უჩიძე, ადიგენი]