ოთხი ოჯახი კვლავ მეწყერსაშიშ ზონაში რჩება

ახალციხის მუნიციპალიტეტის გამგეობაში გარემოსდაცვის სამინისტროდან გეოლოგიური დასკვნა უკვე მიიღეს. ახლა პასუხს ლტოლვილთა და განსახლების სამინისტროდან ელოდებიან.

დასკვნა, აწყურში, მტკვრის მარჯვენა სანაპიროზე შუაზე გადამსკდარი ფერდობისა და ამ ადგილზე დასახლებული ოჯახების უსაფრთხოების შესახებ გარემოსდაცვის სამინისტროში სპეციალურად შექმნილმა კომისიამ მოამზადა.

აწყურში ახალციხის მუნიციპალიტეტის გამგეობის რწმუნებულის გელა მუმლაძის განმარტებით, ამ დოკუმენტის თანახმად, მეწყერსაშიში ზონიდან გასახლებას, მხოლოდ სამი ოჯახი საჭიროებს. დანარჩენი ოთხი ოჯახისათვის აქ ცხოვრება სახიფათო არაა.

ამ დროისთვის იმ სამი ოჯახისთვის, რომელთა სახლებიც დაბზარულია, დროებით თავისუფალი ფართი ისევ აწყურში გამოინახა.

”გეოლოგიური დასკვნის მიღების შემდეგ, ლტოლვილთა და განსახლების სამინისტროს მივწერეთ. ჩამოვიდნენ, დაათვალიერეს ეს ადგილი და ახლა პასუხს ველოდებით. რასაც მოგვწერენ, იმის მიხედვით მოვიქცევით”, - ამბობს ახალციხის მუნიციპალიტეტის გამგებელი გელა დემეტრაძე და ამატებს, რომ თუ ამ სამი ოჯახის დასაბინავებლად ხარჯებს ადგილობრივი თვითმმართველობა გაწვდება, პრობლემას თავად მოაგვარებენ. წინააღმდეგ შემთხვევაში კი აქ ლტოლვილთა და განსახლების სამინისტროს ჩარევენ.

[sknews.ge]