ვიდრე სამინისტრო გამოსავალს იპოვის, შესაძლოა ნაქალაქევი ჩაიძიროს

ათეული წლებია დამეწყრილ სოფელში ასამდე ოჯახი სიკვდილის შიშით ცხოვრობს. ათეულ წლებს ითვლის მთავრობის დანაპირებიც, რომ ადგილობრივებისთვის ალტერნატიულ ფართს გამოყოფენ და სოფელი უსაფრთხო ადგილზე დასახლდება. თუმცა, ამ დრომდე ხან მთავრობის, ხან კი ადგილობრივების მიზეზით, რომ შეთავაზებული ადგილი დასასახლებლად არ მოსწონდათ, სოფელი კვლავ საფრთხის წინაშე რჩება.

სამცხე-ჯავახეთის სამხარეო ადმინისტრაციაში აცხადებენ, რომ თუ ნაქალაქევში მცხოვრებლების პრობლემას მუნიციპალიტეტის გამგეობა ვერ გადაწყვეტს, მაშინ ეს ლტოლვილთა და განსახლების სამინისტროს პრეროგატივაა.

”როგორც ვიცი, ამის შესახებ თავის დროზე სამინისტროს ინფორმაცია მიაწოდეს და საქმის კურსში არიან”, - გვითხრა სამცხე-ჯავახეთში პრეზიდენტის რწმუნებულის მოადგილემ გელა დემეტრაძემ.

ის რომ ნაქალაქევის პრობლემის შესახებ ინფორმირებულნი არიან, ლტოლვილთა და განსახლების სამინისტროში გვიდასტურებენ და ამბობენ, რომ სამწუხაროდ, საქართველოში საკმაოდ ბევრია ისეთი დასახლებული პუნქტი, სადაც ანალოგიური სიტუაციაა. მთლიანობაში ადგილობრივი მუნიციპალიტეტებიდან მოწოდებული მასალების საფუძველზე შექმნილი მონაცემთა ბაზის მიხედვით დაახლოებით 35000 - ზე მეტი ოჯახია სტიქიური მოვლენების შედეგად დაზარალებული, მათგან 11000 - მდე ოჯახის საცხოვრებელი სახლები თითქმის გამოუსადეგარია საცხოვრებლად.
რაც შეეხება კონკრეტულად ნაქალაქევის მოსახლეობის პრობლემას, სამინისტროში გვიხსნიან, რომ რამდენიმე წლის წინ დაზარალებული ოჯახებისათვის შეთავაზებულ იქნა ქვემო ქართლის რეგიონში სახლების შეძენა. სამწუხაროდ, სოფლის მაცხოვრებლებმა უარი თქვეს ამ წინადადებაზე. სამინისტრო ადგილობრივი მუნიციპალიტეტის ხელმძღვანელობასთან ერთად უახლოეს პერიოდში შეიმუშავებს რამდენიმე ალტერნატიულ ვარიანტს.

”ამ სოფლისთვის ყოველ წუთს მნიშვნელობა აქვს, შეიძლება ნებისმიერ წამს მოწყდეს სოფელი”, - ამბობს სამცხე-ჯავახეთის სასწავლო უნივერსიტეტის ბიზნესის ადმინსიტრირების ფაკულტეტის დეკანის მოადგილე, ეკონომიკის მეცნიერებათა დოქტორი გიორგი ბუცხრიკიძე, რომელსაც 90-იან წლებში, როგორც რაიონულ აღმასკომში მიწათსარგებლობის განყოფილების უფროსს ნაქალაქევში დასახლებულებისთვის ალტერნატიული ფართის გამოყოფის შესახებ საკითხის შესწავლა დაევალა.

მისი განმარტებით, სოფელი წყალზე დგას: ”სიპ ქვაზე ზემოდან არის მიწა და მათ შუაში წყალი გადის. ამიტომ აქ მცოცავი ქანებია და შესაძლოა ნებისმიერ წამს მოწყდეს სოფელი”.

სოფელ ნაქალაქევის ადგილზე მე-15-მე-16 საუკუნემდე ქალაქი წუნდა იყო, რომელიც მიწამ ჩაიტანა, სწორედ ამიტომ დაერქვა სოფელ თმოგვიდან თვითნებურად ჩამოსახლებულთა დასახლებას ნაქალაქევი.

[თამუნა უჩიძიე, ახალციხე]