ვინ დასაქმდება სამხარეო ადმინისტრაციაში ერთ კვირაში გაირკვევა

გუბერნიაში შექმნილი საკონკურსო კომისიის ერთ-ერთი წევრი ვლადიმერ ზედგინიძე კონკურსანტების გამოუცხადებლობას მოუმზადებლობით ხსნის: „რამდენიმე გასაუბრების შემდეგ ალბათ გახმაურდა რას ვეკითხებოდით კონკურსანტებს, სავარაუდოდ მოუმზადებლები იყვნენ და ამიტომ არ გამოცხადდნენ“.

მისივე განმარტებით, კონკურსანტებს ნორმატიული აქტების ცოდნა მოეთხოვებოდათ: „ძალიან ელემენტარულს ვეკითხებოდით, მაგალითად, მუშაობის დაწყების შემდეგ რა დაევალებოდათ, რას ნიშნავს საქართველოს კონსტიტუცია, ვინ შეიძლება იყოს და ვინ არა საქართველოს მოქალაქე. გვპასუხობდნენ, რომ ამ ყველაფერს აუცილებლად ისწავლიდნენ, ოღონდ სამსახურის დაწყების შემდეგ“.

კომისიის წევრები კონკურსანტებს 5-ბალიანი სისტემით აფასებდნენ, იმისათვის, რომ ბარიერი გადაელახათ, 12 ქულა უნდა მიეღოთ. ზედგინიძის თქმით, ბარიერის გადალახვა ბევრს გაუჭირდა, შედეგად, შესაძლოა სამ პოზიციაზე კონკურსი თავიდან გამოცხადდეს.

რომელია ეს სამი პოსტი, ამ ეტაპზე, ზედგინიძე გასაჯაროებისგან თავს იკავებს: „ორ დღეში გაიმართება სხდომა, გაირკვევა წარმატებული კონკურსანტების ვინაობა და შედგება საბოლოო ოქმი. შემდეგ გასაჯაროვდება იმ პოზიციების ჩამონათვალი, რომელზეც კონკურსი ხელახლა გამოცხადდება“.

კონკურსანტები შედეგებს კომისიის საბოლოო სხდომიდან 5 დღის ვადაში შეიტყობენ.

შეგახსენებთ, სამცხე-ჯავახეთის სამხარეო ადმინისტრაციაში ამკონკურსის შედეგად 25 ვაკანტური პოსტი უნდა დაკომპლექტდეს. 378 განმცხადებლიდან პირველი ეტაპი, საბუთების გადარჩევა 275-მა აპლიკანტმა გადალახა, ამათგან მეორე ეტაპზე 124 კონკურსანტი არ გამოცხადდა.

კონკურსის მეორე ეტაპი, გასაუბრება, 14 აპრილს დაიწყო. დღეს, 28 აპრილს სამცხე-ჯავახეთის სამხარეო ადმინისტრაციაში გასაუბრება მდივან-რეფერანტებმა გაიარეს. 34 კონკურსანტიდან გასაუბრებაზე მხოლოდ 14 გამოცხადდა. ამით, გუბერნიაში მიმდინარე საჯარო მოეხელეთა შესარჩევი კონკურსი დასრულდა.

[მანანა სარაშვილი, ახალციხე]