სად ვის ავირჩევთ მომავალ არჩევნებზე

საქართველოს მთავრობის N515 განკარგულებით, ახალციხის მუნიციპალიტეტი ორ ადმინისტრაციულ ერთეულად გაიყოფა: ქალაქ ახალციხის მუნიციპალიტეტად და თვითმმართველი თემების ახალციხის მუნიციპალიტეტად.

ქალაქ ახალციხის მუნიციპალიტეტში შევა ახალციხე, რომელიც უკვე თვითმმართველი ქალაქი იქნება. დანარჩენი 47 სოფელი კი ერთ მუნიციპალიტეტად ჩამოყალიბდება.

ორივე თვითმმართველ ერთეულს ეყოლება მერი ან გამგებელი და საკრებულო. თვითმმართველ ქალაქში მერს, მუნიციპალიტეტში კი გამგებელს აირჩევენ. ორივე ადმინისტრაციულ ერთეულში აირჩევენ საკრებულოს თავმჯდომარესა და წევრებს.

ორივე თვითმმართველი ერთეულისთვის ადმინისტრაციული შენობა ახალციხეში უნდა განთავსდეს. ფართის მოძიება თვითმმართველობას უკვე დაევალა.


თვითმმართველობის ახალი კოდექსის თანახმად, თვითმმართველ ქალაქსაც და მუნიციპალიტეტსაც თავისი ბიუჯეტი ექნება, გაიყოფა სამსახურებიც და ქონებაც. ახალციხეს ექნება ისეთივე დატვირთვა, როგორიც აქვს ქუთაისს, ბათუმსა და რუსთავს.

„ადგილობრივი დემოკრატიის ქსელის ცენტრის თავმჯდომარის“ დავით ლოსაბერიძის განმარტებით, გამიჯვნის სქემა ფინანსთა სამინისტრომ უნდა მოამზადოს: „არჩევნების შემდეგ, წლევანდელი წლის ბოლომდე, იქნება გამიჯვნის პროცესი. ახალმა თვითმმართველობებმა ახალი ბიუჯეტი უნდა შეიმუშაონ. ეს არ იქნება უპატრონოდ მიშვებული, ცენტრალური ხელისუფლება ვალდებულია, რომ რადგანაც ამას აკეთებს, დახმარება გაუწიოს და შეიმუშაოს მექანიზმები“.

ახალი კოდექსის თანახმად, საშემოსავლო გადასახადების ნაწილი ცენტრალურ ბიუჯეტში აღარ წავა. თუმცა, რამდენი პროცენტი დარჩება ადგილზე და რამდენი გადაირიცხება, ლოსაბერიძე ვერ აკონკრეტებს. მისი თქმით, პროცენტის განსაზღვრა პოლიტიკაზეა დამოკიდებული.

„ფინანსთა სამინისტრომ უნდა მოამზადოს შესაბამისი გათვლები და 1-ელ სექტემბრამდე გადასცეს პარლამენტს დასამტკიცებლად. როგორ გაკეთდება, ეს სხვა საკითხია. რამდენი პროცენტი იქნება არ ვიცი, ფაქტია, რომ თავიდან დიდი ნაწილი არ იქნება. ჩვენი მიზანია არ შემცირდეს ტრანსფერი და გარდა ამისა, გაიზარდოს საკუთარი შემოსავლები. ტრანსფერის გარდა, შენარჩუნდება რეგიონული პროგრამები ცენტრალური დაფინანსებით. თუმცა რა რაოდენობაზე იქნება საუბარი, ეს მეორე საკითხია“, - განმარტავს ლოსაბერიძე.

მიუხედავად იმისა, რომ ახალციხის მუნიციპალიტეტი ორად გაიყოფა, სამცხე-ჯავახეთის სამხარეო ადმინისტრაციის ადგილობრივი თვითმმართველობის ორგანოებთან ურთიერთობის სამსახურის უფროსის მოვალეობის შემსრულებელი ქეთევან მიშველაძე განმარტავს, რომ ადმინისტრაციული საზღვრები არ იცვლება. ახალციხე, როგორც ქალაქი გამოიყოფა ცალკე, დანარჩენი სოფლები კი ახალციხის მუნიციპალიტეტში შევა.


ქალაქი ახალციხე თავის თვითმმართველობის ორგანოს აირჩევს. მას ეყოლება მერი და 15-კაციანი საკრებულო. ეს იქნება წარმომადგენლობითი ორგანო, რომელიც განისაზღვრება 5 მაჟორიტარული და 10 პროპორციული სისტემით არჩეული დეპუტატით.

ქალაქში თითოეულ უბანს ეყოლება თითო-თითო მაჟორიტარი დეპუტატი. უკვე გადაწყვეტილია, რომ არჩევნებში გამარჯვებას მოიპოვებს ის კანდიდატი, ვინც 50+1 ხმას მიიღებს. არჩევის იგივე პრინციპი მოქმედებს ნებისმიერი სხვა პირის არჩევის შემთხვევაშიც.


თავის მხრივ, თვითმმართველობის ორგანოს აირჩევენ ახალციხის მუნიციპალიტეტშიც. აქ აირჩევენ გამგებელს და 30-კაციან საკრებულოს. 15 იქნება მაჟორიტარული, ამდენივე კი პროპორციული სიით.

რადგან ახალციხის მუნიციპალიტეტი 16 მაჟორიტარულ ოლქად იყო დაყოფილი, მუნიციპალიტეტის გაყოფის შემდეგ, ერთი დარჩა ქალაქ ახალციხეში,დანარჩენი კი ახალციხის მუნიციპალიტეტში.

[თინათინ ზაზაძე, ახალციხე]