არასამთავრობო ორგანიზაცია „დემოკრატ მესხთა კავშირის“ ორგანიზებით, სამოქალაქო სექტორისა და ადგილობრივი თვითმმართველობის წარმომადგენლებმა, სამუშაო შეხვედრა 21 მარტს გამართეს.
„საკმაოდ ძირეული და ბევრი ცვლილებაა ახალ კოდექსში. გარდა იმისა, რომ მერებსა და გამგებლებს პირდაპირი წესით ავირჩევთ, იცვლება ტერიტორიული დაყოფა. ასევე, მოსალოდნელია გარკვეული ცვლილებები საგადასახადო კანონმდებლობაში, საუბარია მოსახლეობის ჩართულობის გაზრდაზე“, - განმარტავს არასამთავრობო ორგანიზაცია „დემოკრატ მესხთა კავშირის“ ხელმძღვანელი გიორგი ანდღულაძე.
მისი თქმით, ამ საკითხებთან დაკავშირებით ადგილობრივი ხელისუფლებისა და არასამთავრობო ორგანიზაციების წარმომადგენლების აზრს, შენიშვნებსა და რეკომენდაციებს დიდი მნიშვნელობა აქვს და აღნიშნული შეხვედრაც სწორედ ამისთვის მოეწყო.
„ძალიან მნიშვნელოვანია, რომ მაქსიმალურად იყოს მოსახლეობა ჩართული ამ პროცესში. თუ რამე ცვლილებაა შესატანი, ეს ყველაფერი გააზრებულად უნდა მოხდეს და არა მექნიკურად. ეს შემდგომში თავიდან აგვაცილებს ცვლილებებს და გაუგებრობებს. ასევე, კანონი იქნება უფრო ეფექტური და მოქნილი“, - ამბობს ანდღულაძე.
თვითმმართველობის კოდექსის ერთ-ერთი მნიშვნელოვანი ნაწილი მუნიციპალიტეტის ადმინისტრაციულ ერთეულებად დაყოფას ეხება. ამ ეტაპზე განიხილება ახალციხის მუნიციპალიტეტის დაყოფის ორი ვარიანტი. ერთ შემთხვევაში შესაძლებელია, რომ ახალციხე იყოს თვითმმართველი ქალაქი და დანარჩენი სოფლები ერთ მუნიციპალიტეტად გაერთიანდეს. ასევე არსებობს მეორე ვარიანტიც, რომლის მიხედვითაც თვითმმართველი ქალაქის გარდა ახალციხე დაიყოს კიდევ ოთხ მუნიციპალიტეტად.
გიორგი ანდღულაძე ფიქრობს, რომ რამდენიმე წვრილ მუნიციპალიტეტად დაყოფა უფრო უკეთესია, ვიდრე ერთ მსხვილ მუნიციპალიტეტად. მისი თქმით, ადმინისტრაციულ ერთეულებად დაყოფა თვითმმართველობის ეფექტურობას გაზრდის.
„ეს გაზრდის რეგიონში დასაქმებული კადრების რაოდენობას. გაუმჯობესდება ინფრასტრუქტურა. გარდა ამისა, ადგილობრივი ხელისუფლება ახლოს იქნება მოსახლეობასთან. ექნება საკუთარი ბიუჯეტი, უკეთ ეცოდინება თავის პატარა მუნიციპალიტეტში შემავალი სოფლების პრობლემები და მის მოგვარებაზე იქნება ორიენტირებული“, - ამბობს გიორგი ანდღულაძე.
ადგილობრივი თვითმმართველობისა და არასამთავრობო სექტორის წარმომადგენლები ამბობენ, რომ თვითმმართველობის სახეცვლილი კოდექსის ამოქმედება საწყის ეტაპზე გარკვეულ სირთულეებთან იქნება დაკავშირებული.
„თუნდაც იმ კუთხით, რომ როცა ადმინისტრაციულ ერთეულებად დაიყოფა, შესაბამისი ინფრასტრუქტურა მოსაწესრიგებელი იქნება. ასევე ცოტა რთული იქნება შტატების დაკომპლექტება ამ ახლადშექმნილ მუნიციპალიტეტებში, რადგან ძალიან სერიოზული განათლებისა და გამოცდილების მქონე ადამიანების მოძიება იქნება საჭირო. თუმცა ვფიქრობ, რომ ჩვენთან ბევრია ისეთი ახალგაზრდა, რომელსაც დამთავრებული აქვს უმაღლესი სასწავლებელი და მათ მიეცემათ გასაქანი იმისთვის, რომ ადგილზე დასაქმდნენ“, - ამბობს ახალციხის მუნიციპალიტეტის საკრებულოს ფრაქცია „ქართული ოცნება ახალციხის“ თავმჯდომარე ნუგზარ თამარაშვილი.
[თამარ თოთაძე, ახალციხე]