ვინ იბრძვის მერობისა და გამგებლობისთვის ახალციხეში

1990 წლიდან დღემდე საქართველოში 25 არჩევნები ჩატარდა: 6 საპრეზიდენტო, 8 საპარლამენტო, 4 ადგილობრივი თვითმმართველობისა და 7 აჭარის უმაღლესი საბჭოს. გაიმართა ორი რეფერენდუმი და ერთი პლებისციტი. რიგით 26–ე არჩევნები 2014 წლის 15 ივნისს ჩატარდება, პარალელურად, ეს იქნება თვითმმართველობის მე–5 არჩევნები.

15 ივნისს საარჩევნო კაბინაში შესულ ამომრჩეველს სამი ბიულეტენი დახვდება. თუ აქამდე ახალციხეს დანიშნული გამგებელი ჰყავდა, ამ არჩევნებზე თვითმმართველი ქალაქის ახალციხის მოსახლეობა აირჩევს მერს, ახალციხის მუნიციპალიტეტში კი აირჩევენ გამგებელს.

გარდა ამისა, 15 ივნისს ამომრჩევლები აირჩევენ საკრებულოს წევრებს, პროპორციული და მაჟორიტარული სისტემით. პროპორციული სისტემით არჩევა ნიშნავს, რომ პარტიას მისცემენ ხმას. მაჟორიტარული სისტემით, კი კონკრეტულად პარტიის მიერ, ამა თუ იმ მაჟორიტარულ საარჩევნო ოლქში წარდგენილ კანდიდატს აირჩევენ, პარტიიდან, ან საინიციატივო ჯგუფიდან. ეს იმ შემთხვევაში, თუ აღნიშნულ მაჟორიტარულ ოლქში საინიციატივო ჯგუფს კანდიდატი ჰყავს.

2014 წლის 15 ივნისს, ქალაქ ახალციხის მცხოვრებლები ქალაქის მერს ხუთი კანდიდატიდან შეარჩევენ.

მერის პოსტისთვის ოთხი მამაკაცი და ერთი ქალი იბრძვის: ნატალი სისვაძე – ბლოკ „არასაპარლამენტო ოპოზიციიდან“, ზაზა ნათენაძე – „ნინო ბურჯანაძე – ერთიანი ოპოზიციიდან“, გელა დემეტრაძე – ბლოკ „ერთიანი ნაციონალური მოძრაობიდან“, გოჩა ათოშვილი – „სალომე ზურაბიშვილი – საქართველოს გზიდან“ და გიორგი კოპაძე – ბლოკ „ქართული ოცნებიდან“.

ქალაქ ახალციხის მცხოვრებლების მსგავსად, ხუთი კანდიდატიდან შეარჩევენ გამგებელს, ახალციხის მუნიციპალიტეტის სოფლებში მცხოვრებლებიც.

თუმცა, მერობის კანდიდატებისგან განსხვავებით, ხუთივე კანდიდატი მამაკაცია: ბახვა გელაშვილი – ბლოკ „არასაპარლამენტო ოპოზიციიდან“ (კახა კუკავა, ფიქრია ჩიხრაძე); ოლეგი ძოწენიძე – „ნინო ბურჯანაძე, ერთიანი ოპოზიციიდან“; გოჩა გვარამაძე – ბლოკ „ერთიანი ნაციონალური მოძრაობიდან“; მამუკა გოგოლაძე – „დავით თარხან მოურავი – საქართველოს პატრიოტთა ალიანსიდან“ და ზაზა მელიქიძე – ბლოკ „ქართული ოცნებიდან“.

[ნინო ნარიმანიშვილი, ახალციხე]