ქალები თვითმმართველობაში

15 ქალი დეპუტატიდან, 10 პროპორციული სისტემითაა არჩეული, 5 კი მაჟორიტარია. 15 დეპუტატიდან უმრავლესობა, 11, „ქართული ოცნების“ წევრია, 3 – „ერთიანი ნაციონალური მოძრაობის“ და 1 „ნინო ბურჯანაძე – ერთიანი ოპოზიციის“

2014 წლის 15 ივნისის ადგილობრივი თვითმმართველობის არჩევნების შედეგად თვითმმართველი ქალაქის ახალციხის საკრებულოში სულ 15 დეპუტატი იქნება, აქედან ქალი მხოლოდ 3. ნინო ანანიაშვილი, „ქართული ოცნებიდან“ და ირმა ხნკოანი ,„ერთიანი ნაციონალური მოძრაობიდან“, პროპორციული საარჩევნო სისტემით; თამარ გოგოლაძე, „ქართული ოცნებიდან“ კი მაჟორიტარული სისტემით.

რაც შეეხება ახალციხის თვითმმართველ თემს, აქ სულ 30 დეპუტატი იქნება და მათ შორის 6 ქალი.

პროპორციული საარჩევნო სისტემით ახალციხის თვითმმართველი თემის საკრებულოში „ქართული ოცნებიდან“ მერი ხაბეიშვილი, თამარი გოგინაშვილი და მაია ინასარიძე შევლენ, „ერთიანი ნაციონალური მოძრაობიდან“ კი მარინე სუდაძე და ირინა გელაშვილი. მაჟორიტარული საარჩევნო სისტემით კი მხოლოდ ერთი ქალი დეპუტატი სედა ნახაპეტიანია არჩეული, რომელიც „ქართულ ოცნებას“ წარმოადგენს.

თვითმმართველი ქალაქის ახალციხის მსგავსად, მხოლოდ 3 ქალი დეპუტატი ეყოლება ბორჯომს, სადაც ჯამში 26 დეპუტატია. მაია ხრიკაძე, „ნინო ბურჯანაძე – ერთიანი ოპოზიციიდან“ და მარინე ნოზაძე, „ქართული ოცნებიდან“ პროპორციული საარჩევნო სისტემით არიან არჩეული, ელიზავეთა კუჭუხიძე კი „ქართული ოცნებიდან“ არჩეული მაჟორიტარია.

ასევე 3 ქალი დეპუტატი ეყოლება ადიგენის თვითმმართველი თემს, სადაც საკრებულო 30 დეპუტატით კომპლექტდება. აქ სამივე „ქართული ოცნების“ მანდატით შევა. ნინო ჩოგოვაძე, პროპორციული საარჩევნო სისტემით, ნანა ბარბლიშვილი და ნინა სტეფანოვა კი მაჟორიტარული საარჩევნო სისტემით.

რაც შეეხება ასპინძის თვითმმართველ თემს, აქ საკრებულოს 27 დეპუტატიდან ქალი დეპუტატი არცერთი არ არის.

ახალქალაქისა და ნინოწმინდის მონაცემები ამ ეტაპზე უცნობია. ნინოწმინდიდან არჩევნების შემაჯამებელი ოქმი იმის გამო ვერ მივიღეთ, რომ დარღვევების გასაჩივრების ვადა არ ამოწურულა. ასევე, ჯერ ისევ გრძელდება საჩივრების განხილვა ახალქალაქში, გარდა ამისა, 29 ივნისს, ახალქალაქში, ერთ უბანზე, განმეორებითი კენჭისყრა ჩატარდა.

[თამარ თოთაძე, ახალციხე]