ახალციხის გამგებლის შემდეგ, უფლებამოსილება შესაძლოა საკრებულოს თავმჯდომარესაც შეუჩერდეს [Video]

მთავარი → SK TV » ვიდეო 04.04.2014

ახალციხის მუნიციპალიტეტის გამგეობაში პროკურატურის მიერ დაწყებული ძიების პარალელურად, რასაც გამგებლის უფლებამოსილების შეწყვეტა მოჰყვა, ადგილობრივ ხელისუფლებაში საქმის ძიება ფინანსთა სამინისტროს საგამოძიებო სამსახურსაც აქვს დაწყებული.

თვითმმართველობაში ფიქრობენ, რომ ამ საქმით ოლეგ სანდროშვილის თანამდებობიდან ჩამოშორება სურთ. ახალციხის მუნიციპალიტეტის საკრებულოს თავმჯდომარე ოლეგ სანდროშვილი ირწმუნება, რომ მისი თანამდებობიდან ჩამოცილების მიზნით გამგეობის თანამშრომლებზე ზეწოლა ხორციელდება. ამის შესახებ მან 3 აპრილს, მედიისთვის გამართულ ბრიფინგზე განაცხადა. მისი თქმით, იმისთვის რომ მისი იმპიჩმენტის საკითხი დადგეს, ფინანსთა სამინისტროს საგამოძიებო სამსახურის სამცხე-ჯავახეთის სამმართველომ გამგეობის თანამშრომელს, რევაზ მერაბიშვილს, მისი საწინააღმდეგო ჩვენება, ფსიქოლოგიური ზეწოლის შედეგად მიაცემინა. მერაბიშვილს 27 მარტს, აღნიშნულ სამსახურში, 5 საათის განმავლობაში ჰკითხავდნენ.

ფინანსთა სამინისტროს საგამოძიებო სამსახურში ამბობენ, რომ სამცხე-ჯავახეთის სამმართველო ახალციხეში, ასპინძის ქუჩის 28-ე კორპუსის გადახურვის საქმეს, 182-ე მუხლით იძიებს და გამგეობის თანამშრომლები ნამდვილად დაკითხეს, თუმცა, ზეწოლას ადგილი არ ჰქონია.

[თამარ თოთაძე, ნინო ნარიმანიშვილი, ახალციხე]