რევაზ მერაბიშვილი დაკითხვის დეტალებს იხსენებს [Video]

მთავარი → SK TV » ვიდეო 03.04.2014

ვიდეომასალაში, რომელიც ახალციხის მუნიციპალიტეტის საკრებულოს შენობაშია ჩაწერილი, გამგეობის თანამშრომელი რევაზ მერაბიშვილი იხსენებს, ფინანსთა სამინისტროს საგამოძიებო სამსახურის სამცხე-ჯავახეთის სამმართველოში, 27 მარტს, მისი დაკითხვის დეტალებს.

25-წუთიან ვიდეოში მერაბიშვილი ამბობს, როდის და რა ვითარებაში მიიყვანეს დაკითხვაზე, რას ესაუბრებოდნენ და რატომ მოაწერა ხელი იმ ჩვენებას, რის მიცემასაც მისგან ითხოვდნენ. ვიდეოში ჩანს, რომ მერაბიშვილს საუბარი უჭირს. მას კითხვებს ნუგზარ სამარჯიშვილი და ლაშა ამირეჯიბი უსვამენ. ნუგზარ სამარჯიშვილის განცხადებით, ამ ვიდეოჩანაწერის გაკეთება მისი და ლაშა ამირეჯიბის იდეა იყო. ამირეჯიბი ახალციხის ციხის დირექტორის თანაშემწე და ახალციხის მუნიციპალიტეტის საკრებულოს თავმჯდომარესთან, ოლეგ სანდროშვილთან დაახლოებული პირია.

აღნიშნული პირები ვიდეოჩანაწერის გაკეთების იდეას იმით ხსნიან, რომ მერაბიშვილს, რომელიც ფსიქოლოგიური ზემოქმედების ქვეშაა, მედიასთან საუბარი უჭირს და საზოგადოებამ უნდა იცოდეს, რა მოხდა 27 მარტს სამმართველოში.

25-წუთიანი ვიდეოდან, რომელშიც მეორდება კითხვები ერთსა და იმავე თემაზე, "სამხრეთის კარიბჭე" ყველაზე მნიშვნელოვან დეტალებს გთავაზობთ.

ვიდეოს გავრცელების შემდეგ, "სამხრეთის კარიბჭე" მომხდარის შესახებ ფინანსთა სამინისტროს საგამოძიებო სამსახურს დაუკავშირდა. აღიშნული სამსახურის პრესსამსახურში განმარტავენ, რომ ფინანსთა სამინისტროს საგამოძიებო სამსახურის სამცხე-ჯავახეთის სამმართველოს დაწყებული აქვს ძიება ახალციხეში, ასპინძის ქუჩაზე მდებარე 28-ე კორპუსის გადახურვის საქმეზე და ამასთან დაკავშირებით, გამგეობის თანამშრომლები ნამდვილად დაკითხეს.

„რაც შეეხება ზეწოლას, რაზეა საუბარი, არანაირი ზეწოლა არ ყოფილა. ცალსახად და ერთმნიშვნელოვნად, გამორიცხულია რაიმე სახის, მინიმალური, ფისქოლოგიური ზეწოლა“, - განუცხადა „სამხრეთის კარიბჭეს“ პრესსამსახურის წარმომადგენელმა გიორგი გრძელიშვილმა.

დაკითხვის დეტალებზე შეგიძლიათ იხილოთ სტატიაც.

[ნინო ნარიმანიშვილი, თამარ თოთაძე ახალციხე]