ფინანსთა სამინისტროს საგამოძიებო სამსახური: მოწმეზე ზეწოლა არ განხორციელებულა

ფინანსთა სამინისტროს საგამოძიებო სამსახურის პრესსამსახურის წარმომადგენლის გიორგი გრძელიშვილის განმარტებით, ფინანსთა სამინისტროს საგამოძიებო სამსახურის სამცხე-ჯავახეთის სამმართველოს დაწყებული აქვს ძიება ახალციხეში, ასპინძის ქუჩაზე მდებარე 28-ე კორპუსის გადახურვის საქმეზე და ამასთან დაკავშირებით, გამგეობის თანამშრომლები ნამდვილად დაკითხეს.

„რაც შეეხება ზეწოლას, რაზეა საუბარი, არანაირი ზეწოლა არ ყოფილა. ცალსახად და ერთმნიშვნელოვნად, გამორიცხულია რაიმე სახის, მინიმალური, ფისქოლოგიური ზეწოლა“, - განუცხადა „სამხრეთის კარიბჭეს“ გიორგი გრძელიშვილმა.

მისი განმარტებით, ფინანსთა სამინისტროს საგამოძიებო სამსახურის სამცხე-ჯავახეთის სამმართველო, ასპინძის ქუჩის 28-ე კორპუსის საქმეზე ძიებას სსკ-ის 182-ე მუხლით აწარმოებს, რაც თანხის მითვისებას ან გაფლანგვას გულისხმობს.

შეგახსენებთ, დღეს, 3 აპრილს, ახალციხის მუნიციპალიტეტის საკრებულოს თავმჯდომარემ ოლეგ სანდროშვილმა სპეციალური ბრიფინგი გამართა, რომელზეც განაცხადა, რომ ფინანსთა სამინისტროს საგამოძიებო სამსახურის სამცხე-ჯავახეთის სამმართველოში გამგეობის თანამშრომლებს ზეწოლის შედეგად ხელი მოაწერინეს მის საწინააღმდეგო ჩვენებაზე.

მოგვიანებით, საკრებულოში ჟურნალისტებს ვიდეომასალა გადასცეს, რომელშიც ერთ-ერთი დაკითხული, რევაზ მერაბიშვილი დაკითხვის დეტალებს იხსენებს. იგი ამბობს, რომ მასზე ფსიქოლოგიური ზეწოლა მიმდინარეობდა და საბოლოოდ, მზა ჩვენებას ხელი ისე მოაწერა, დოკუმენტი არ წაუკითხავს.

[ნინო ნარიმანიშვილი, ახალციხე]