პროკურატურა რევაზ მერაბიშვილის საფინანსო პოლიციაში დაკითხვის დეტალებს არკვევს

დაახლეობთ ერთი საათია, რაც საოლქო პროკურატურაში გამომძიებელი ნინო აღნიაშვილი ახალციხის მუნიციპალიტეტის გამგეობის ინფრასტრუქტურის განვითარების სამსახურის სპეციალისტთან რევაზ მერაბიშვილთან გამოკითხვის ოქმს ადგენს.

მერაბიშვილმა საოლქო პროკურატურაში განცხადება იმის შესახებ, რომ მასზე ფინანსთა სამინისტროს საგამოძიებო სამსახურის სამცხე-ჯავახეთის სამმართველოში ფსიქოლოგიური ზეწოლა განხორციელდა, 3 აპრილს შეიტანა.

მერაბიშვილის განცხადებით, მასზე ზეწოლა ახალციხის მუნიციპალიტეტის საკრებულოს თავმჯდომარის ოლეგ სანდროშვილის წინააღმდეგ ცრუ ჩვენების მისაცემად განახორციელეს.
მერაბიშვილის გამოკითხვას ესწრება მისი ადვოკატი ირაკლი ბარძიმაძე.

„გამოკითხვა მშვიდ და ნორმალურ პირობებში მიმდინარეობს“, - ამბობს იგი.

ბარძიმაძის განცხადებით, სწორედ ამ გამოკითხვის შემდეგ გადაწყვეტს პროკურატურა დაიწყებს თუ არა საქმის ძიებას: „თუ ძიებას დაიწყებენ, დაიბარებენ უკვე დაკთხვაზე, ან, წესით ამის შესახებ მას ოფიციალურად, წერილობით უნდა აცნობონ“.

[თამუნა უჩიძე, ახალციხე]