რა საკითხებზე ისაუბრა სამცხე-ჯავახეთის გუბერნატორმა პრემიერთან შეხვედრაზე

31 მარტს საქართველოს პრემიერ-მინისტრი ირაკლი ღარიბაშვილი გუბერნატორებს შეხვდა და სამთვიანი მუშაობის შედეგებს გაეცნო. სამცხე-ჯავახეთის სამხარეო ადმინისტრაციის ადგილობრივი თვითმმართველობის ორგანოებთან ურთიერთობის სამსახურის მთავარი სპეციალისტის ია გოგატიშვილის თქმით, აკაკი მაჭუტაძემ პრემიერს ყველა იმ პროექტის მიმდინარეობა გააცნო, რომელსაც საქართველოს მთავრობა სამცხე-ჯავახეთში ახორციელებს.

როგორც სამცხე-ჯავახეთის სამხარეო ადმინისტრაციაში განმარტავენ, "სოფლის მხარდაჭერის პროგრამის" ფარგლებში რეგიონში 429 პროექტი განხორციელდება, რასაც ჯამში 3,533,779 ლარი მოხმარდება.

"რაც შეეხება ინფრასტრუქტურულ პროექტებს, გუბერნატორმა პრემიერს აღნიშნულ სამუშაოებზე დეტალური ინფორმაცია მიაწოდა. საპროექტო სამუშაოები დასრულების ფაზაშია და პროექტების განხორციელება უმოკლეს ვადებში დაიწყება", - განმარტავს ია გოგატიშვილი.

მისივე თქმით, რეგიონში ინფრასტრუქტურული პროექტების განსახორცელებლად 13 მილიონი ლარია გამოყოფილი.

აკაკი მაჭუტაძემ პრემიერს "მცირემიწიან ფერმერთა 2014 წლის საგაზაფხულო სამუშაოების ხელშეწყობის პროექტის" მიმდინარეობაც გააცნო. აღნიშნული პროექტის ფარგლებში მიმდინარე წელს 44 ათას 334 ბენეფიციარი ისარგებლებს. ამ დროისთვის 37 ათას 255 ვაუჩერია დარიგებული, რაც მთლიანი რაოდენობის 93, 6 პროცენტს შეადგენს.

შეხვედრაზე აკაკი მაჭუტაძემ გაზიფიცირებაზეც ისაუბრა. მისი თქმით, ახლო მომავალში თითქმის ყველა მუნიციპალიტეტში გაზიფიცირების სამუშაოები დაიწყება.

შეგახსენებთ, რომ ახალციხეში, ადიგენსა და ასპინძაში გაზიფიცირების პროცესი 2012 წლის ოქტომბერში შეწყდა.

[მანანა სარაშვილი, ახალციხე]