ახალციხეში მცირემიწიან ფერმერთა დახმარების პროგრამის დეტალებზე იმსჯელებენ

ხვალ ახალციხეს შპს „მექანიზატორის“ დირექტორი ზვიად ჩხაიძე, მისი მოადგილე ალექსანდრე ნასარიძე და სოფლის მეურნეობის პროექტების მართვის სააგენტოს „მცირემიწიან ფერმერთა 2015 წლის საგაზაფხულო სამუშაოების პროექტის“ მენეჯერი დავით კიკნაძე ესტუმრებიან. ისინი სამცხე–ჯავახეთის გუბერნატორს და მუნიციპალიტეტების გამგებლებს შეხვდებიან. შეხვედრაზე ადგილობრივი თვითმმართველობის წარმომადგენლებს პროექტის შესახებ დეტალურ ინფორმაციასმიაწვდიან.

შეგახსნებთ, რომ „მცირემიწიან ფერმერთა 2015 წლის საგაზაფხულო სამუშაოების ხელშეწყობის პროექტი“ სოფლის მეურნეობის სამინისტროს ინიციატივით, სოფლის მეურნეობის პროექტების მართვის სააგენტომ თებერვლიდან დაიწყო. აღნიშნული პროექტის ფარგლებში წინასწარი მონაცემებით ხვნის ბარათებს სამცხე-ჯავახეთის 37 ათას 450 ფერმერი მიიღებს.

მთავრობის ინიციატივით სოფლის მეურნეობის სამინისტრომ და სოფლის მეურნეობის პროექტების მართვის სააგენტომ საგაზაფხულო სამუშაოების ხელშეწყობის პროექტი 2013 წელს დაიწყო. წელს სამწლიანი პროგრამის ბოლო ეტაპია. სამთავრობო პროგრამა სოფლად მაცხოვრებლების ფერმერულ მეურნეობად ჩამოყალიბების მიზნით მათ ხელშეწყობას ითვალისწინებდა.

[sknews.ge]