სამცხე–ჯავახეთში მიმდინარე ინფრასტრუქტურულ პროექტებს გიორგი ამაშუკელი გაეცნო

საგზაო ინფრასტრუქტურის მოსაწესრიგებლად მხარეში 11 მილიონი ლარია გამოყოფილი და ჯამში 32 კმ. სიგრძის გზა დაიგება. ხოლო 3 მილიონი ლარი სასმელი წყლის სისტემების 58 კილომეტრიანი მაგისტრალის რეაბილიტაციას მოხმარდება.

სამცხე–ჯავახეთის სამხარეო ადმინისტრაციაში განმარტავენ, რომ ამ დროისთვის სამუშაოების 80 პროცენტი დასრულებულია, წლის ბოლომდე კი ყველა პროექტის ჩაბარება იგეგმება.

რეგიონში მიმდინარე სამუშაოები გუშინ, 16 სექტემბერს, საქართველოს მთავრობის ადმინისტრაციის რეგიონებთან და ადგილობრივ თვითმმართველ ორგანოებთან ურთიერთობის დეპარტამენტის ხელმძღვანელმა გიორგი ამაშუკელმა მოინახულა, მხარისა და მუნიციპალიტეტების პირველ პირებთან ერთად მოინახულა.

გიორგი ამაშუკელმა ბორჯომში სოფელ ცემში გზის 2 კილომეტრიან მონაკვეთზე ბეტონის გზის მშენებლობის პროცესი დაათვალიერა.

სამხარეო ადმინისტრაციის ინფორმაციით, საკურორტო ზონაში არსებულ სოფელში, სადაც შიდა გზის პრობლემა წლების განმავლობაში იყო, საგზაო ინფრასტრუქტურის მოწესრიგება მნიშვნელოვნად შეუწყობს ხელს ტურიზმის განვითარებას.

შეგახსენებთ, მიმდინარე წელს რეგიონული განვითარების ფონდის დაფინანსებით სამცხე-ჯავახეთში ინფრასტრუქტურულ პროექტების განსახორციელებლად 14 მილიონი ლარი იხარჯება. სულ, სამცხე-ჯავახეთის მუნიციპალიტეტებში რეგიონული პროექტების ფონდიდან, ადგილობრივი ბიუჯეტიდან და სოფლის მხარდაჭერის პროგრამის ფარგლებში დაფინანსებული 720 მასშტაბური, მცირე და საშუალო ინფრასტრუქტურული პროექტი ხორციელდება.

[თამარ თოთაძე, ახალციხე]