სამცხე–ჯავახეთში საგაზაფხულო ხვნები მიმდინარეობს

რეგიონის მასშტაბით პროექტის ფარგლებში ჯამში 2.608 ჰექტარი მიწის ფართობი მოიხვნება. საგაზაფხულო სამუშაოები უკვე დაწყებულია ასპინძაში, ადიგენსა და ახალციხეში.

"მცირემიწიან ფერმერთა 2016 წლის საგაზაფხულო სამუშაოების ხელშეწყობის პროექტით“ სამცხე–ჯავახეთში 37. 535 ბენეფიციარი ისარგებლებს.

საქართველოს სოფლის მეურნეობის სამინისტროს სამცხე–ჯავახეთის რეგიონული სამმართველოს უფროსის მოადგილის მამუკა თამარაძის განმარტებით, ამ დროისთვის რეგიონში მოხნულია 254 ჰექტარი მიწის ფართობი.

შპს "მექანიზაციაში" ხვნა–თესვისთვის 55 ტრაქტორი ყავთ, რომელიც რეგიონზეა გადანაწილებული.

"მცირემიწიან ფერმერთა 2016 წლის საგაზაფხულო სამუშაოების ხელშეწყობის პროექტისთვის“ 2016 წელს ცენტრალური ბიუჯეტიდან 48 მილიონი ლარი დაიხარჯება.

შეგახსენებთ, რომ "მცირემიწიან ფერმერთა საგაზაფხულო სამუშაოების ხელშეწყობის პროექტი" მეოთხე წელია მიმდინარეობს. პროექტის მენეჯერის დავით კიკნაძის განმარტებით, პროგრამა 2017 წელს აღარ გაგრძელდება.

"გვინდოდა დახმარება აღმოგვეჩინა მცირემიწიანი ფერმერებისთვის. ჩვენ მარტო მიწის დამუშავებაში არ ვეხმარებოდით, მათ ინვენტარის ყიდვის საშუალებაც მივეცით. თავიდანვე იყო გათვლილი, რომ ნელნელა ფერმერის კულტურა ჩამოყალიბებულიყო და დაბრუნებოდნენ თავიანთ მიწას, ჩვენ კი უნდა გამოვსულიყავით ამ სუბსიდირებიდან. წინა წელს ბევრი სტიქიური მოვლენა იყო და ბოლომდე საშემოდგომო სამუშაოები ვერ ჩავატარეთ, სწორედ ამიტომ ფერმერების თხოვნით და ამ ყველაფრის გათვალისწინებით გადავწყვიტეთ წელსაც გაგვეგრძელებინა პროექტი. 2017 წელს აღარ გაგრძელდება", – ამბობს დავით კიკნაძე.

[თინათინ ზაზაძე, ახალციხე]