სამცხე-ჯავახეთის გუბერნიაში 25 თანამშრომელს შეარჩევენ

სამხარეო ადმინისტრაციაში მოხელეთა შესარჩევი კონკურსი 18 მარტს გამოცხადდა. ამ კონკურსის შედეგად, ადმინისტრაციაში უნდა დაკომპლექტდეს სახელმწიფო რწმუნებულის - გუბერნატორის აპარატი და სამი სამსახური: ადგილობრივი თვითმმართველობის ორგანოებთან ურთიერთობის, რეგიონული პროექტების კოორდინირებისა და საგანგებო სიტუაციების. გარდა ამისა, შეირჩევა მდივანი-რეფერანტი, რომელიც გუბერნატორის უშუალო დაქვემდებარებაში იქნება.

სახელმწიფო რწმუნებულის-გუბერნატორის აპარატში ვაკანტური 4 პოსტია: 1 - მთავარი სპეციალისტის, 2 - უფროსი სპეციალისტის და 1 - სპეციალისტის.

6 ვაკანსიაა ადგილობრივი თვითმმართველობის ორგანოებთან ურთიერთობის სამსახურში. აქ სამსახურის უფროსს, მის მოადგილეს და 4 უფროს სპეციალისტს შეარჩევენ.

5 თანამშრომელს შეარჩევენ რეგიონული პროექტების კოორდინირების სამსახურში: სამსახურის უფროსის მოადგილეს, მთავარ სპეციალისტს, სპეციალისტსა და 2 უფროს სპეციალისტს.

ყველაზე მეტი, 9 ვაკანსიაა, საგანგებო სიტუაციების მართვის სამსახურში. აქ ვაკანტური შემდეგი პოსტებია: სამსახურის უფროსი, უფროსის მოადგილე, 2 უფროსი სპეციალისტი და 5 სპეციალისტი.

კონკურსში მონაწილეობის მსურველებს ვაკანსიების ნახვა საჯარო სამსახურის ბიუროს ვებ-გვერდზე (www.hr.gov.ge) შეუძლიათ. მსურველებს განაცხადების წარდგენა საშუალება მხოლოდ ელექტრონულად, 27 მარტის ჩათვლით აქვთ.

კონკურსის ამ ეტაპით სამხარეო ადმინისტრაციაში საკადრო ცვლილებები დასრულდება, თუმცა, გუბერნატორის ორი მოადგილის პოსტი კვლავ ვაკანტური დარჩება. როდის და რა ფორმით შეარჩევს სახელმწიფო რწმუნებული მოადგილეებს, ამ ეტაპზე უცნობია.

შეგახსენებთ, კონკურსის პირველი ეტაპი სამცხე-ჯავახეთის სამხარეო ადმინისტრაციაში მიმდინარე, 2014 წლის დასაწყისში ჩატარდა.

[თინათინ ზაზაძე, ახალციხე]