შეხვედრა, რომელიც 2 საათს გაგრძელდა, სამცხე-ჯავახეთის სახელმწიფო უნივერსიტეტში შედგა. დუსკუსიას უნივერსიტეტის ადმინისტრაციის წარმომადგენლები, პედაგოგები, სტუდენტები, სახელმწიფო სტრუქტურებისა და სამოქალაქო საზოგადოების წარმომადგენლები ესწრებოდნენ.
დისკუსია პროექტის „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება“ პრეზენტაციით დაიწყო. ამ პროექტის მიზანი ქვეყნის უმაღლესი განათლებისა და მეცნიერების განვითარების სტრატეგიული მიმართულებების იდენტიფიცირება და სექტორის გარდაქმნის სტრატეგიული გეგმის შემუშავებაა.
უმაღლესი განათლების პოლიტიკის ანალიზის საფუძველზე ექსპერტების მონაწილეობით მომზადდა დოკუმენტების სამუშაო ვერსიები ხუთი სტრატეგიული მიმართულების მიხედვით.
1. უნივერიტეტების ავტონომია და აკადემიური თავისუფლება;
2. უმაღლესი განათლებისა და კვლევის დაფინანსება და ფინანსური მართვა;
3. სწავლებისა და კვლევის ინტეგრაცია;
4. უმაღლესი განათლება და დასაქმება;
5. ხარისხის უზრუნველყოფა;
ჩატარებული კვლევის შედეგად მომზადდა ქვეყანაში არსებული მდგომარეობის ანალიზი, რომელიც უმაღლესი განათლების სტრატეგიის შექმნას უნდა დაეხმაროს. შემუშავდა დასკვნები და რეკომენდაციები კანონში შესატანი ცვლილებებით.
„ჩვენ გვაინტერესებს სამოქალაქო საზოგადოების და აკადემიური პრესონალის აზრი ამ კვლევებთან დაკავშირებით. მათი შენიშვნებსა და რეკომენდაციებს გავითვალისწინებთ საბოლოო ვერსიაში, რომელიც წარედგინება განათლების სამინისტროს. როდესაც სამინისტრო დაიწყებს სტრატეგიულ გეგმაზე მუშაობას, იმედია, რომ მათთვის საინტერესო იქნება ამ კვლევებისა და აკადემიური პერსონალის მოსაზრებების გაცნობა“, - ამბობს „ფონდი ღია საზოგადოება საქართველოს“ უმაღლესი განათლების პროგრამის მენეჯერი ხათუნა იოსელიანი.
სამცხე-ჯავახეთის სახელმწიფო უნივერსიტეტის წარმომადგენლობითი საბჭოს სპიკერი, ასოცირებული პროფესორი ფინანსების მიმართულებით, როინ თათეშვილი ამბობს, რომ მას უმაღლესი სასწავლებლების ქონების მართვის საკითხები აინტერესებდა: „მაგალითად, როგორ მოხდება ქონებისა და ფინანსების განკარგვა. ამ მიმართულებით დღეს არსებობს ხარვეზები. საშტატო ერთეულებისა და სტრუქტურის დამტკიცება, მართალია ხდება წარმომადგენლობითი საბჭოს მიერ, მაგრამ ისევ სამინისტროსთან არის შესათანხმებელი, რაც იწვევს გაურკვევლობას. იგივე კითხვა მქონდა შესყიდვებთან დაკავშირებით. იმედი მაქვს ამ ყველაფერს გაითვალისწინებენ“.
პროექტი „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება“, 2013 წელს, ფონდ ”ღია საზოგადოება-საქართველო”-ს ფინანსური მხარდაჭერით განათლების პოლიტიკის დაგეგმვისა და მართვის საერთაშორისო ინსტიტუტმა (EPPM) განახორციელა. პროექტის პარტნიორები იყვნენ: TEMPUS-ის ეროვნული ოფისი, სოციალურ მეცნიერებათა ცენტრი(CSS), საერთაშორისო განათლების ცენტრი(CIE) და ღია საზოგადოების ფონდების აკადემიური მხარდაჭერის პროგრამა(AFP).
მსგავსი საჯარო დისკუსიები უკვე გაიმართა ქუთაისსა და ბათუმში. დაგეგმილია კიდევ რამდენიმე ქალაქში. შეხვედრების შედეგად დაგროვილი რეკომენდაციები კი საბოლოო დოკუმენტში აისახება.
[თინათინ ზაზაძე, ახალციხე]