ახალციხეში უმაღლესი განათლების ინტერნაციონალიზაციაზე იმსჯელეს

სამცხე–ჯავახეთის სახელმწიფო უნივერსიტეტში საჯარო დისკუსია ფონდი „ღია საზოგადოება – საქართველოს“ და ფონდი „საერთაშორისო განათლების ცენტრის“ ერთობლივი პროექტის ფარგლებში მოეწყო. აღნიშნული პროექტის მიზანია ხელი შეუწყოს უმაღლესი განათლების სფეროში ინტერნაციონალიზაციის საკითხებით, უმაღლესი განათლების გლობალიზაციის მიერ შექმნილი გამოწვევებითა და შესაძლებლობებით აკადემიური საზოგადოების ფართო წრეების დაინტერესებასა და ამ კუთხით საჯარო და საუნივერსიტეტო პოლიტიკის განვითარებას.

„ინტერნაციონალიზაცია შევარჩიეთ იმის გათვალისწინებით, რომ როცა გასულ წელს აკადემიურ სამოქალაქო საზოგადოებასთან გვქონდა დებატები, გამოიკვეთა, რომ სწორედ ეს არის ის სერიოზული გამოწვევა და შესაძლებლობა, რასაც აკადემიური საზოგადოება ხედავს. შესაბამისად გადავწყვიტეთ, რომ ეს მიმართულება განგვეხილა“, – ამბობს ფონდი „საერთაშორისო განათლების ცენტრის“ სტიპენდიანტი, პროექტის ფასილიტატორი თეა სიფრაშვილი და ამატებს, რომ აღნიშნული შეხვედრებისა და დებატების საფუძველზე შემუშავდება პოლიტიკური ნარკვევები, რომელიც დაეხმარება, როგორც საუნივერსიტეტო ხელმღვანელობას, ასევე სამინისტროს იმისთვის, რომ სწორად დაგეგმოს უმაღლესი განათლების პოლიტიკა.

მისივე თქმით, აღნიშნული პროექტის მიზანი უნივერსიტეტებისთვის ორმხრივია. ერთის მხრივ სასწავლებლები იღებენ გამოცდილებას თუ როგორ ახერხებენ სხვა უნივერსიტეტები გლობალიზაციის პირობებში საკუთარი სწავლების ხარისხის გაუმჯობესებას, რა სტრატეგიები აქვთ შემუშავებული და როგორ ხდება ამ სტრატეგიების განხორციელება. მეორეს მხრივ კი მათ აქვთ საშუალება საკუთარი აზრი გამოთქვან და რეკომენდაციები შეიმუშავონ იმისთვის, რომ ცენტრალიზებულად დაგეგმილი პოლიტიკის ნაცვლად,
მოხდეს პრაქტიკოსებისაგან მიღებული გამოცდილების გათვალისწინება.

სამცხე–ჯავახეთის სახელმწიფო უნივერსიტეტში ამბობენ, რომ მართალია ინტერნაციონალიზაციის საკითხი როგორც აკრედიტაციის სტანდარტი ჯერ არ არის შეტანილი და დამკვიდრებული, მაგრამ სამომავლოდ აუცილებლად იქნება ავტორიზაცია–აკრედიტაციის სტანდარტი. ამიტომ ის საკითხი რაზეც დღეს დისკუსია გაიმართა, მომავალში საკმაოდ მოთხოვნადი იქნება.

„ჩვენ გააზრებული გვაქვს რა დიდი ბარიერები გვაქვს გასავლელი ამ მიმართულებით, მაგალითად ენის ცოდნა სტუდენტების, აკადემიურ თუ ადმინისტრაციულ დონეზე. ენის ბარიერი კი თავის მხრივ ხელს უშლის პროგრამების მომზადებას. პროგრამას ერთის მხრივ უნდა ჰყავდეს თავისი მსმენელი და უნდა გვყავდეს ადგილობრივი მსმენელიც. გარდა ამისა მთავარია, განმახორციელებლები და აუცილებელი ლიტერატურა. ძალიან შრომატევადი გზა არის გასავლელი“, – ამბობს სამცხე–ჯავახეთის სახელმწიფო უნივერსიტეტის რექტორის მოადგილე ნიკოლოზ ახალკაცი.

მსგავსი დისკუსია საქართველოს სხვადასხვა ქალაქების უნივერსიტეტებში ეწყობა.

[თამარ თოთაძე, ახალციხე]