ახალციხეში უმაღლესი განათლებისა და მეცნიერების სტრატეგიულ განვითარებაზე იმსჯელებენ

შეხვედრას უნივერსიტეტის ადმინისტრაციის წარმომადგენლები, პედაგოგები, სტუდენტები, სახელმწიფო სტრუქტურებისა და სამოქალაქო საზოგადოების წარმომადგენლები დაესწრებიან.

შეხვედრაზე დაგეგმილია პროექტის - „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება" პრეზენტაცია, რომელიც ფონდი „ღია საზოგადოება-საქართველოს" ფინანსური მხარდაჭერით განხორციელდა.

პრეზენტაციის შემდეგ კი დისკუსია გაიმართება, რომლის მიზანია აკადემიური საზოგადოების, სტუდენტების, სახელმწიფო სტრუქტურების წარმომადგენლების და სამოქალაქო საზოგადოების აქტიური ჩართვა უმაღლესი განათლების სარეფორმო პროცესებში.

2013 წელს ფონდ ”ღია საზოგადოება-საქართველო”-ს ფინანსური მხარდაჭერით განათლების პოლიტიკის დაგეგმვისა და მართვის საერთაშორისო ინსტიტუტმა (EPPM) განახორციელა პროექტი „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება“. პროექტის პარტნიორები იყვნენ: TEMPUS-ის ეროვნული ოფისი, სოციალურ მეცნიერებათა ცენტრი(CSS), საერთაშორისო განათლების ცენტრი(CIE) და ღია საზოგადოების ფონდების აკადემიური მხარდაჭერის პროგრამა(AFP).

პროექტის მიზანი ქვეყნის უმაღლესი განათლებისა და მეცნიერების განვითარების სტრატეგიული მიმართულებების იდენტიფიცირება და სექტორის გარდაქმნის სტრატეგიული გეგმის შემუშავება იყო.

[sknews.ge]