განათლების მინისტრი ახალციხეში სტუდენტებსა და აბიტურიენტებს შეხვდა

საინფორმაციო სახის შეხვედრა სამცხე–ჯავახეთის სახელმწიფო უნივერსიტეტის პირველი კორპუსის ბიბლიოთეკაში გაიმართა. შეხვედრას თამარ სანიკიძესთან ერთად ათასწლეულის გამოწვევის ფონდის საქართველოს აღმასრულებელი დირექტორი მაგდა მაღრაძე და აშშ–ი სან დიეგოს სახელმწიფო უნივერსიტეტის (SDSU) საქართველოს დეკანი კენ ულში ესწრებოდა.

შეხვედრის მიზანი სტუდენტებისთვის, ასევე, დამამთავრებელი კლასების მოსწავლეებისთვის და სკოლის დირექტორებისთვის პროექტის - „სან დიეგოს სახელმწიფო უნივერსიტეტი და საქართველო 2020“ - გაცნობა იყო. უმაღლესი განათლების შესახებ პროექტს აშშ–ს ათასწლეულის გამოწვევის კორპორაცია აფინანსებს.

„ჩენი ვიზიტის მიზანია სტუდენტებს გავაცნოთ სანდიეგოს სახელმწიფო უნივერსიტეტის საბაკალავრო პროგრამები და მივაწოდოთ ინფორამცია ამ უნიკალრი პროგრამის შესახებ, რომელიც ითვალისწინებს საქართველოში ამერიკული განათლების საბაკალავრო პროგრამების განხორციელებას“, – ამბობს სან დიეგოს სახელმწიფო უნივერსიტეტის (SDSU) საქართველოს დეკანი კენ ულში.

აღნიშნულ პროექტს, სან დიეგოს სახელმწიფო უნივერსიტეტი და საქართველოს სამი სახელმწიფო უნივერსიტეტისგან შემდგარი კონსორციუმი განახორციელებს. შედეგად, კურსდამთავრებულები საქართველოში მიიღებენ ამერიკულ განათლებასა და დიპლომებს საინჟინრო, ტექნოლოგიებისა და საბუნებისმეტყველო სპეციალობებში.

პროექტის ბიუჯეტი 30 მილიონ დოლარს შეადგენს.

„ჩვენ დღეს მოვუყევით სტუდენტებს და სკოლის მოსაწავლეებს იმ ახალი პროგრამის შესახებ, რომელიც იწყება. ეს არის ძალიან მაღალი ხარისხის საინჟინრო და ტექნოლოგიური მიმართულებების განსახორციელებელი პროგრამები. აბიტურიენტს უნდა ჰქონდეს იმის შესაძლებლობა რომ ბოლომდე გაეცნოს და ისარგებლოს ამ პროგრამით“, – ამბობს თამარ სანიკიძე.

პროექტის განხორციელება 2014 წელს დაიწყო. ის ზოგადი, პროფესიული და უმაღლესი განათლების სექტორში პროექტების განხორციელებას ითვალისწინებს.

[მანანა სარაშვილი, ახალციხე]