რას მოუტანს Erasmus + სამცხე-ჯავახეთის უნივერსიტეტს

ხუთი მილიონი ევროს ღირებულების პროექტი ექვს პროგრამას მოიცავს. მათგან სამცხე-ჯავახეთის სახელმწიფო უნივერსიტეტი მხოლოდ ერთ, „უმაღლესი განათლების სფეროში შესაძლებლობების ზრდის“ (CBHE) პროგრამაში მონაწილეობს.

ევროკავშირის მიერ დაფინანსებულ პროექტების „Erasmus+“-ის სამცხე-ჯავახეთის უნივერსიტეტის ინსტიტუციური მენეჯერის, თინა გელაშვილის თქმით, რეგიონული უნივერსიტეტები სტრატეგიული განვითარების დოკუმენტის შესადგენად, ევროპის წამყვანი უნივერსიტეტების ცოდნას გაიზიარებენ და 20 ქვეყნის უმაღლეს საგანმანათლებლო დაწესებულებებსა და ორგანიზაციებთან ითანამშრომლებენ.

„როგორც გამოიკვეთა, რეგიონულ უნივერსიტეტებს სტრატეგიის შემუშავება უჭირთ, ამ პროექტის ფარგლებში კი მოხდება უნივერსიტეტებში სტრატეგიული დაგეგმარება. ჩვენი მიზანი იქნება, ყველა უნივერსიტეტში შეფასდეს რა რესურსებს ფლობს ის ფინანსური და მატერიალური კუთხით“, - ამბობს გელაშვილი.

მისივე განმარტებით, სამცხე-ჯავახეთის უნივერსიტეტი, რვა ქართულ უნივერსიტეტთან და ევროპის ოთხ პარტნიორ უნივერისტეტთან ერთად, კონსორციუმშია წარმოდგენილი: „კონსორციუმში ჩეხეთის, პორტუგალიის, ლიეტუვის და ავსტრიის უნივერისტეტებიდან სტრატეგიული განვითარების დაგეგმვის საუკეთესო გამოცდილების მქონე წევრებთან ერთად ვიმუშავებთ. ფაქტობრივად, უნდა გვასწავლონ, თუ როგორ მზადდება სტრატეგია. ამ პროგრამისთვის 602 ათასი ვეროა გამოყოფილი“.

კონსორციუმი ქუთაისის უნივერსიტეტში 2019 წლის 15 ოქტომბერს ჩატარდება.

„Erasmus +“-ის პროგრამა რამდენიმე ეტაპად განხორციელდება, იგი 2019 წლის ნოემბერსა და 2020 წლის იანვარში დაიწყება.

[ავთო ინასარიძე, ახალციხე]