ახალციხეში ცხრა აპრილის სკვერის მშენებლობა განახლდა

ცხრა აპრილის ქუჩაზე სკვერის მოწყობისა და კორპუსებთან მისასვლელი გზის რეაბილიტაციის პროექტი საქართველოს რეგიონული განვითარებისა და ინფრასტრუქტურის სამინისტრომ გასულ წელს დაამტკიცა. აღნიშნული პროექტი 400,000 ლარით დაფინანსდა. კორპუსებთან მიმსასვლელ გზებზე ასფალტი გასულ წელსვე დაიგო, თუმცა ყინვებისა და უამინდობის გამო სკვერის მოწყობა ვერ დასრულდა.

ახალციხის მუნიციპალიტეტის გამგეობაში განმარტავენ, რომ ცხრა აპრილის სკვერში მხოლოდ ქვაფენილის დაგება ვერ მოასწრეს. თუმცა, სამუშაოები უკვე განახლდა.

„მიმდინარეობს ქვაფენილის დაგება და უახლოეს დღეებში დასრულდება“, - განმარტავს ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე.

შეგახსნებთ, რომ გასულ წელს ახალციხეში ოთხი ახალი სკვერის მშენებლობა დაიგეგმა. თამარაშვილის ქუჩაზე ორი სკვერი უკვე გაკეთდა, ერთი, ეგრეთ წოდებული, რვასართულიანების ეზოში და მეორე სამედიცინო კოლეჯის წინ. ცხრა აპრილის ქუჩაზე კი ორივე სკვერის მოწყობა გაზაფხულზე დასრულდება.

[თამარ თოთაძე, ახალციხე]