ახალციხეში 2013 წლიდან დარჩენილი 3 პროექტიდან, 1 დღეს დასრულდება

რეგიონებში განსახორციელებელი პროექტების ფონდიდან დაფინანსებული 19 პროექტიდან, ახალციხემ გასულ წელს სამის დასრულება ვერ მოასწრო. აქედან, ერთ-ერთი ახალციხეში, 9 აპრილის ქუჩაზე, სკვერის მშენებლობაა.

9 აპრილის ქუჩაზე სკვერის მოწყობისა და კორპუსებთან მისასვლელი გზის რეაბილიტაციის პროექტი 400,000 ლარით დაფინანსდა. ახალციხის მუნიციპალიტეტის გამგებლის მოვალეობის დროებით შემსრულებლის მალხაზ ჟუჟუნაძის თქმით, 9 აპრილზე სკვერის მშენებელ ფირმას „კენტავრი და კომპანიას“ სამუშაოების დასრულების ვადა დღეს ეწურება: „თუ ვერ დაასრულებენ, მაშინ მეორე დღიდანვე ჯარიმა დაერიცხებათ“.

სკვერის მშენებელი კომპანიის მთავარი ინჟინერი ნოდარ ბალახაშვილი ამბობს, რომ ამ დროისთვის სკვერში მხოლოდ 10 კვადრატულ მეტრზე დარჩა ფილები დასაგები და დღის ბოლომდე მასაც დაასრულებენ. მანამდე კი ახალგაკეთებული სკვერიდან სამშენებლო ნარჩენი გააქვთ.

რაც შეეხება დანარჩენ ორ პროექტს, მალხაზ ჟუჟუნაძის თქმით, თვის ბოლომდე აქვს სამუშაოების დასრულების ვადა ახალციხეში, ჯაყელის ქუჩაზე გზის მშენებელ კომპანიას. „ასტორიამ“ პროექტში კორექტირება შეიტანა.

„30-40 მეტრის ფეხით სავალი ბორდიული დაემატა. ეს თავიდან პროექტში გათვალისწინებული არ იყო, მაგრამ ახლა ჩავსვით. ამისთვის თანხის დამატება არ გვიწევს და ვფიქრობ მშენებელი ფირმა ვადებში ჩაეტევა“, - ამბობს ჟუჟუნაძე.

რაც შეეხება მესამე გარდამავალ პროექტს, მუსხი-ხეოთის გზას, მისი მშენებლობა გაურკვეველი ვადითაა შეჩერებული. აღნიშნული პროექტის მშენებლობის გამო აქ კერძო საკუთრებაში არსებული ბაღები დაზიანდა. საქმეს ასპინძის რაიონული სამმართველო სსკ-ის 87-ე მუხლით იძიებს, რაც სხვისი ქონების დაზიანებას გულისხმობს. ამავე პროექტის მშენებლობისას დაზიანდა ამ ტერიტორიაზე არსებული კულტურული ძეგლი, ამის გამო კი ახალციხის მუნიციპალიტეტის გამგეობა რიგ საკითხებს კულტურის სამინისტროსთან არკვევს.

მალხაზ ჟუჟუნაძის განცხადებით, ვიდრე ყველა პროექტი ხარისხიანად არ შესრულდება, არ ჩაიბარებენ: „ხალხი უნდა იყოს კმაყოფილი, თორემ ისე პროექტს ვერ მივიღებ“.

[თამუნა უჩიძე, ახალციხე]