ბორჯომში სანაპიროს სკვერის რეაბილიტაცია სექტემბრის ბოლოს დასრულდება

ბორჯომის მუნიციპალიტეტის გამგეობის ინფორმაციით, რუსთაველის ქუჩაზე სანაპიროს სკვერის სარეაბილიტაციო სამუშაოები სექტემბრის ბოლოს დასრულდება. პროექტის ფარგლებში ძველი ფილებისა და სხვა სამშენებლო კონსტრუქციების დემონტაჟი მოხდა, სკვერის მთელ პერიმეტრზე მოეწყო ახალი ბორდიურები, დაიგო გრანიტისა და ბაზალტის ფილები. მოწესრიგდა სავალი ბილიკები.

ადგილობრივ თვითმმართველობაში განმარტავენ, რომ ამ ეტაპზე პერგოლების მონტაჟი და სამღებრო სამუშაოები მიმდინარეობს. მოწესრიგდება ასევე სარწყავი სისტემა.

"სკვერის რეკონსტრუქციის ფარგლებში დაგეგმილია რუსთაველის მოედნის გაერთიანება სანაპირო სკვერთან, გათვალისწინებულია ეფექტური განათება, გაზონებისა და დასაჯდომი ადგილების მოწყობა. ავტოტრანსპორტის მოძრაობისა და გაჩერების მოსაწესრიგებლად მოეწყობა მრგვალი ფორმის გაზონი და დამატებითი ადგილი მანქანების გასაჩერებელი", – განმარტავენ ბორჯომის მუნიციპალიტეტის გამგეობაში.

რუსთაველის ქუჩაზე არსებული სანაპირო სკვერის რეაბილიტაციისთვის ადგილობრივი ბიუჯეტიდან 558 064 ლარი გამოიყო. სარეაბილიტაციო სამუშაოებ შპს "ანელო" ასრულებს.

[თამარ თოთაძე, ბორჯომი]