ახალციხეში ოთხი ახალი სკვერი კეთდება

რეგიონული განვითარებისა და ინფრასტრუქტურის სამინისტროს მიერ ახალციხის მუნიციპალიტეტში დაფინანსებული 19 პროექტიდან ერთ-ერთი თამარაშვილისა და 9 აპრილის ქუჩებზე სკვერების მოწყობასა და კორპუსებთან მისასვლელი გზის მოასფალტებას ითვალისწინებს.

აღნიშნულ ქუჩებზე სკვერების კეთილმოწყობა თითქმის ერთი თვეა მიმდინარეობს. სამუშაოებს ტენდერში გამარჯვებული შპს „კენტაური და კომპანია“ ასრულებს.

თამარაშვილის ქუჩაზე ორი სკვერი კეთდება, ერთი, ეგრეთ წოდებული, რვასართულიანების ეზოში და მეორე სამედიცინო კოლეჯის წინ.

„ყველა სკვერში დაიგება ფილები, დაიდგმება სკამები, გაკეთდება განათება და გაზაფხულიდან გამწვანებასაც დავიწყებთ“,- ამბობს ახალციხის მუნიციპალიტეტის გამგებელი ბესიკ ბლიაძე.

თამარაშვილის ქუჩაზე კორპუსებთან მისასვლელი გზის მოასფალტება და სკვერების მოწყობა 298,170 ლარი ჯდება.

ორი სკვერი მოეწყობა 9 აპრილის ქუჩაზეც. ბლიაძის თქმით, აღნიშნულ ქუჩაზე სკვერისთვის ტერიტორიის მოსასწორებლად მოსახლეობის მიერ უკანონოდ მითვისებული ნაკვეთების დაშლა გახდა საჭირო, რაზეც მოსახლეობას პრეტენზია არ გამოუთქვამს.

„9 აპრილზე სკვერისთვის უფრო დიდი ტერიტორია გამოიძებნა. ორივე სკვერში 1700 კვადრატზე ქვაფენილი უნდა დაიგოს, რჩება ღია ადგილები, სადაც გამწვანება გაკეთდება“,-ამბობს ბლიაძე.

9 აპრილის ქუჩაზე, სკვერების გარდა, კორპუსებთან მისასვლელი გზაც კეთდება. საერთო ჯამში, აღნიშნული პროექტისთვის 400,000 ლარია გამოყოფილი.

ბესიკ ბლიაძის თქმით, ქალაქში ოთხივე სკვერის გაკეთება სავარაუდოდ ერთ თვეში დასრულდება. მომავალი წლიდან ქალაქში კიდევ რამდენიმე ინფრასტრუქტურული პროექტის განხორციელება იგეგმება.

[მანანა სარაშვილი, ახალციხე]