ბორჯომში, 9 აპრილის ქუჩის სარეაბილიტაციო სამუშაოები გაგრძელდა

რეგიონში განსახორციელებელი პროექტების ფონდიდან გასულ წელს ბორჯომის მუნიციპალიტეტში დაახლოებით 5 მილიონი ლარი გამოიყო. ამ თანხით ხუთი პროექტი დაფინანსდა. ბორჯომის მუნიციპალიტეტის გამგეობის საზოგადოებასთან ურთიერთობის სამსახურში განმარტავენ, რომ გასულ წელს დაგეგმილი პროექტებიდან მხოლოდ ერთი პროექტის დასრულება ვერ მოესწრო, გარდამავალ პროექტებში 9 აპრილის ქუჩის რეაბილიტაცია გადავიდა.

„9 აპრილის ქუჩის რეკონსტრუქციის ფარგლებში რეაბილიტაცია ჩაუტარდა სანაპირო მოაჯირებს, დაიგო ქვაფენილი, მოეწყო დეკორატიული განათება, ასევე მიმდინარეობს 9 აპრილის მემორიალთან სკვერის მოწყობა, მარჯვენა სანაპროზე ნაპირსამაგრი კედლის რეაბილიტაცია, სავალი ნაპირისა და ტროტუარის რეაბილიტაცია. რეკონსტრუქცია ჩაუტარდა ორსართულიანი სახლს. მიმდინარეობს ყოფილი ჭადრაკის სასახლის მიმდებარე ტერიტორიის კეთილმოწყობა“, - განმარტავენ ბორჯომის მუნიციპალიტეტის გამგეობაში.

აღნიშნული სამუშაოებისთვის გასულ წელს საქართველოს რეგიონული განვითარებისა და ინფრასტრუქტურის სამინისტრომ 829,990 ლარი გამოყო.

[თამარ თოთაძე, ბორჯომი]