ადიგენში გამგებლის მოვალეობის შემსრულებელი დაინიშნა

ადიგენის მუნიციპალიტეტის საკრებულოს თავჯდომარის გივი ენდელაძის განმარტებით, ადიგენის მუნიციპალიტეტის ყოფილ გამგებელს სიმონ პარუნაშვილს, რომელიც გირაოს სანაცვლოდაა გათავისუფლებული, სასამართლომ უფლებამოსილება 29 აგვისტოს, დროებით შეუწყვიტა.

გამგებლის პოსტზე კონკურსი ჯერ არ გამოცხადდება. არსენ ბალახაშვილი იმ დრომდე შეასრულებს გამგებლის მოვალეობას, ვიდრე სასამართლო სიმონ პარუნაშვილს განაჩენს არ გამოუტანს. სასამართლო 25 ოქტომბერსაა დანიშნული.

„სასამართლო გადაწყვეტილებამდე კონკურსს ვერ გამოვაცხადებთ, რადგან პარუნაშვილს უფლებამოსილება დროებით აქვს შეწყვეტილი. მას გადადგომასთან დაკავშირებით განცხადება არ აქვს დაწერილი, შესაბამისად, არ გვაქვს უფლება კონკურსი გამოვაცხადოთ“,-ამბობს ადიგენის მუნიციპალიტეტის საკრებულოს თავჯდომარე გივი ენდელაძე.

შეგახსენებთ, ადიგენის მუნიციპალიტეტის გამგებელი სიმონ პარუნაშვილი, 27 აგვისტოს, ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ დააკავა. მას ბრალი 332-ე მუხლის პირველი ნაწილით, ორ ეპიზოდში ედება, რაც სამსახურეობრივი უფლებამოსილების გადამეტებას გულისხმობს. გამგებელს ტენდერში მონაწილე კომპანიისადმი მიკერძოებულობაში დასდეს ბრალი. 29 აგვისტოს ახალციხის რაიონულმა სასამართლომ ადიგენის გამგებელს 3000 ლარის ოდენობის გირაო შეუფარდა.

არსენ ბალახაშვილი 2008 წლის ივლისიდან გამგებლის პირველ მოადგილედ მუშაობდა.

[sknews.ge]