ადიგენში საკონკურსო კომისია თავმჯდომარემ, გივი ენდელაძემაც დატოვა

საკრებულოს თავმჯდომარე გივი ენდელაძე

ადიგენის მუნიციპალიტეტის საკრებულოს თავმჯდომარე, რომელიც ამავე დროს თვითმმართველობაში მოხელეთა შესარჩევად შექმნილ საკონკურსო კომისიას ხელმძღვანელობდა, ამბობს, რომ კომისია ოჯახური პირობების გამო დატოვა.


"არ მქონდა დრო, რომ საკონკურსო-საატესტაციო კომისიისთვის მეხელმძღვანელა“,- აცხადებს ენდელაძე.

10 თებერვალს შექმნილ საკონკურსო-საატესტაციო კომისიაში7 წევრი იყო. ენდელაძე მესამეა, ვინც კომისიას ტოვებს.

14 თებერვალს კომისია დატოვეს გამგებლის მოვალეობის შემსრულებელმა არსენ ბალახაშვილმა და გამგებლის მოადგილის მოვალოების შემსრულებელმა ზაზა ძინძიბაძემ.

ამათგან, ბალახაშვილმა კომისია მას შემდეგ დატოვა, რაც გაირკვა, რომ მას და ენდელაძეს უმაღლესი განათლების დამადასტურებელი დიპლომები არ ჰქონდათ. თუმცა,ენდელაძე, რომელმაც კომისია დღეს დატოვა, ირწმუნება, რომ უდიპლომობა არაფერ შუაშია.

დღეიდან, ენდელაძის ნაცვლად, კომისიას მისი მოადგილე, თემურ ფეიქრიშვილი უხელმძღვანელებს. დღეიდან კომისიის წევრი გახდა ზაქარია ენდელაძეც, რომელიც ასევე დღეიდან შეუდგა გამგებლის მოვალეობის შესრულებას.

თემურ ფეიქრიშვილის თქმით, ზაქარია ენდელაძეს კანონი ავალდებულებს, რომ კომისიის წევრი გახდეს.

ამ ეტაპზე 7-კაციან კომისიას ერთი წევრი აკლია.

"ვინ დაინიშნება ამ ადგილზე, ხვალ გაირკვევა“,- ამბობს ფეიქრიშვილი და აქვე ამატებს, რომ მომავალ კვირას უკვე გაირკვევა კანდიდატებთან გასაუბრების ვადებიც.


კომისიის ახალი ხელმძღვანელი თემურ ფეიქრიშვილი
[მანანა სარაშვილი, ახალციხე]