'სოფლის მხარდაჭერის პროგრამის' ფარგლებში სამცხე-ჯავახეთში 30 პროექტის განხორციელება არ დაწყებულა

„სოფლის მხარდაჭერის პროექტის“ ფარგლებში სამცხე-ჯავახეთში დაგეგმილი პროექტების 39% სოფლის ინფრასტრუქტურის მოწესრიგებას ეხება, შემდეგ მოდის წყლის პრობლემების მოგვარება - 29%, გზის რეაბილიტაცია -16% და სპორტული ინფრასტრუქტურა - 8%.

უფრო კონკრეტულად, რეგიონში დაფინანსებული პროექტებიდან, სოფლის ინფრასტრუქტურის მოწესრიგებას 176 პროექტი ეხება; 128 პროექტი მომზადდა წყლის რებილიტაციის შესახებ; 70 - გზის რეაბილიტაციას, 35 კი სპორტული ინფრასტრუქტურის მოწყობას ეხება; 15 პროექტია ინვენტარის შესყიდვის შესახებ; 5 პროექტი გულისხმობს საბავშვო ინფრასტრუქტურის მოწყობას და სხვა დანარჩენი სხვადასხვა ტიპის პროექტების საერთო რაოდენობაა - 18.

ეკონომიკური პოლიტიკის კვლევის ცენტრის ანალიზის მიხედვით, სამცხე-ჯავახეთში დაგეგმილი 452 პროექტიდან, 381დასრულებულია, 41 მიმდინარეობს და 30 პროექტი ჯერ არ დაწყებულა.

ამავე ორგანიზაციის ანალიზის თანახმად, „სოფლის მხარდაჭერის პროგრამის“ ფარგლებში გამოყოფილი საერთო თანხიდან სამცხე-ჯავახეთზე 8% მოდის.

ეკონომიკური პოლიტიკის კვლევის ცენტრმა აღნიშნული ანალიზი პროექტის „სოფლის მხარდაჭერის პროგრამების“ მონიტორინგი და ეფექტიანობის ანალიზი ფარგლებში მოამზადა. ერთწლიანი (2013-2014წწ) პროექტის მიზანი „სოფლის მხარდაჭერის პროგრამის“ და ასევე, რეგიონებში განხორციელებული პროექტების 200 მლნ. ფონდის ხარჯვის ეკონომიკური ეფექტიანობის ანალიზი, 2013 წლის ბიუჯეტში ამ მიზნით გამოყოფილი თანხების გამჭვირვალობის უზრუნველყოფა და რეკომენდაციების შემუშავებაა შემდგომი წლებისთვის პროგრამის წარმატებით განხორციელებისათვის.

[ნინო ნარიმანიშვილი, ახალციხე]